O Tebendang

Nenoki o tebendang aser nenok o mebendangtsü; aser nenoki taitsü, aser nenok maitsütsü; tai tokang aser nenok dang adoktsü. Luke 6:37.
O bendangba aser tangatetba tsüngda nung tejangja tepila lir. Tsüngremi nisung mulungjang aser parnok tebilembatem metet (A.Shin 16:2). Tsüngremi dang shirnok merenshitsüla shidak obendang agütsütsü akok. Tatem anogo nung asenok ajak o bendangtsü asoshi obendangba menden nung Khrista amentsü (2 Kor. 5:10). Asenok tebilemtsüji asenoki obendangba menden nung mener, shirnoki temenen menaogo ta asenoki bilemer parnok nem obendang agütsüner! Laishibai ashir, asenoki o mebendangtsüla mesüra tangar maitsütsüla kechiaser asenok obendangtsü aser kasa mapang nung mekümzüktettsü. Asenoki kar o bendangtsü aser kasa mapang nung parnok asoshi sarasademtsütsüji tasak. Asenok obendang agütsüba kasa mapang nungji Tsüngrem tekümzükba mapa nung asenok matener akümtsü akok. Laishibai ashir, Tsüngremi kasaji asenok nem ajangzüktsütsü. Tangar dang asenoki koma benshir kasaji asenok dang benshitsü (Luke 6:38).
Tangar o mebendangtsü Tsüngremi asenok nem ozüng agütsür saka asenok nem tangatetba kadaktsüner. Nisungtem tanelaren jenjang, parnok taküm süngjang (mapa) nungi metettsü ta Yisui ashi (Matt. 7:16). Nisungi ayi dong nungi tsükmenatsü maonger ta Yisui ashi. Nisung ka taküm nungi ayi adokra, paji tsükmenatsü tezü masü ta asenoki metettsü. Asenok o Bendangertem asü? Masü, asenok tangatetter lir. Laishibai ashir, Sensamasarji mintokang (A.Shin 22:10; 17:12). Asenoki sensamasar aser tamashirji mejangjara, asenoki Tsüngremer ozüng nung tashi angatsü makok. Sensamasar tamashi jangjabaji obendangba masü, tangatetba lir.
Temenen lenmang nungi kümzüktsü asoshi tangar taküm ajia alitsü Laishibai ashir.
Tsüngremi reprangba ama nai reprang nung dang nai tangar yaritetttsü.
Nai o bendanga lira Tsüngrem dang tatok meshiang aser tenzüker ka ama Tsüngremi amshitsü ne sasa tenangzükba agiang aser jungtepshitsür akümtsü (2 Kor. 5:18).