O tebendang aser mang teyang

Tsüngrem tsüngdang asenoki asenoksasa inyaktsü memelaba mapa kar lir. Item rongnungji obendang agütsüba aser mangyangba na ya tongtibang teinyaktsütem rongnung dena lir. Atangji, tangar mapa nung obendang agütsütsü aser tangar dak mang ayangtsübaji asenoki inyaknüba aser jangraba mapatem asütsü akok saka item khurettemji Tsüngremi asen melen inyaktsü agizükadokogo. Anungji, asenoki Tsüngremi nung ta ashiba mapatemji inyakra asenok Tsüngrem nungi ochiobendang angutsü melen temerenshiang angutsü aser asen dak tamajung inyakertem dak Pai mang ayangtsü melen meyiper asenokang temerenshi angutsü. Asenok taküm libaliro nung tekümdangtsü mapatemji itemji asütsü. Mathi tapu 7 nung, nai tangar obendangtsüba den kasasa na obendangtsü ta bilema nai tangar o tebendang ta shia aliba angutsü. Ibaji, atangji, tajidaktsüka aser tarendaktsüka lir, kechiyong aiben asenoki asenok dakbo tai mali ama bilemer aser tangar tai aser parnoki aibelenba dang bilema parnok aitsür aser nüngsen jembitsür. Aji oda, asenoki tangar dak tai anguba amaji Tsüngremi asen tashimait repranga obendang agütsü nungbo asenok kodanga Pa tsüngdang memetentsüsa alinungji, asenoki asen tashimait meteta tangar obendangtsü melen tadokang agüjang ta ashir. Ibayongji, Tsüngremi asenok nem tangari asenok dak kechikomaka tai inyakdir inyakaka mang ayangtsüba shilemjibo Pa nem tokjang ta Rom tapu 12: 19 aser Tazüngkunem tapu 32:35 nung shia angutsü. Asenoki angatettsüba kaji, asenok dak asen tai mali ser tamajung inyaker aser ashioktsürtem dak mang mangyangtsü ta masü saka parnoka parnok mapa yari mang ayangtsübasa saka ibaji Tsüngremi ayangtsü, anungji pa mapa südakjang ta ashir. Ibajisa tajungba. Aiben asenoki asenok dak tamajung inyakertem anema tamajung inyaktsü matatetter, tangsa tang mangyangner. Atangji, ibaji meimchir yimya. Ajisüaka, asenoki Tsüngrem dak amangra, iba tamang jagi asenoki Tsüngremer mapangji atatettsü. 2 Peter 3:9 nung ashir, ” Tsüngremi asenok dang nangzükba inyaktsü asoshi Pai memenur, ajisüaka Paji talangka atapisaa aremzüka ataba Tsüngrem lir,” ta shia angutsü. Ano, 2 Korint 5:10 nung, ”  tatembang nungbo nisung shiai peii inyakba mapatem indang kuli agütsütsü,” ta shia angur. Atangji, alima nung asenok nükdang asenok dang tamajung inyakertemang tajungba, takarba aser jangratatemba lia aor. Idangji, asenok mulung yirur aser Tsüngrema mali amato bilema alitsüa akok. Ajisüaka, T.Ken 37 nung ashir, ” tamajunger asoshi shisatebulu mesüra shiri tamajung inyaker parnok tenükshi, kechiyong kopi melii parnokji ayi ama akongtsü aser parnokji Lebanon nung Cedar süng ama kodanga melaotsü aser mesamatsü amai liaka, parnokji tera tashi atsüdoktsü aser nenoki parnokji kong meyia liasüar iba tesemji dena mangutsü.” Tsüngremji ochi Tsüngrem, Pai nisung shia nem pei mapa yari alima nung taküm alidanga aser sür külena obendang agütsütsü. Pai asenok atema mang yangtsütsü. Asenoki mangyangtet meyangtet kecha mali, shibai aser shirnoki asenok tai mali ser nung asenok anema inyaker, parnok anema Kibubai mang ayangtsü. Aji oda, asenoki matateti tamajung inyakertem dak mang yangra, iba jagi asenoki Tsüngrem dak mamangba kuli sayur asütsü. Ajisüaka, Tsüngrem dak amanga kodang asenoki tangar dak mangyangtsüba mapaji Pa nem toktsüdir, idangjiang asenok mulung anisüngzüktsü aser tepela arutsü. Ashiko, asen mulungjangi Tsüngremer mapang matatettsüsa inyaktsü ajungshitsüa akok, saka ibaji asen tsükchri ajungshir ta bilemtsüla aser mangyangtsüba mapajibo Tsüngremer shilem ta bilemtettsüla.