O. Tinu Lkr aser Toshipokba na bye-election nung metokteptsü

Mokokchung, March 28 (TYO): Tang aruya aliba 26 Aonglenden Assembly Constituency bye-election nung National People’s Party (NPP) ticket nungi tokteptsü tenüng agütsür alisang O. Tinu Lkr aser Naga People’s Front (NPF) ticket nungi tenüng agütsüsang Toshipokba Lkr nadi March 28 nü election nung metokteptsü atema pei tenüng withdraw süogo, ta 26 Aonglenden A/C bye-election Returning Officer & Mokokchung SDO (C), Abhinav Shivam IAS-i osangzülurtem den pa taktang nung jembidang metetdaktsü.
Joko 26 Aonglenden A/C bye-election nungji Nationalist Democratic Progressive Party (NDPP) candidate Sharingain Lkr o Indian National Congress (INC) candidate Alem Jongshi na dang tokteptsü, ta RO & SDO (C)-isa metetdaktsü. Parliamentary aser 26 Aonglenden A/C bye-election nung nomination file sür alirtemi metoktepnüra withdraw asütsü atema tatembang anogoji March 28, 2019 liasü.
Iba dak sentakba nung iba osangbeneri Mokokchung Division NPF President, Moasangba Jamir den jembidang, “onok party candidate Toshipokba withdraw asübaji pa mulungka nungi inyakba lir, anungji, party temzüngi melaba ama pa anema tapet mapa inyaktsü”, ta ashi.
Iba dak sentakba nung March 28 aonung onok ajungben Mokokchung Division NPF ketdangpurtem temeja senden ka jatepa lir aser March 29 nü sanen luden jateptsü bilemdar, anungji, iba senden mener külenjiang tanabuba meraji agitsü, ta paisa shisem.
26 Aonglenden nungji NPF nungi tokteper mali asünung shir telok asemtsü? ta metetnüa asüngdangdang, “26 Aonglenden A/C nungji NPF party meraksai shitak amenoka lir, anungji, March 29 senden nungji kechi mera agitsüar ajakji lemtettsü”, ta langzü.