O. Tinu Lkr nem NPP ticket agütsüogo

Mokokchung, March 23 (TYO): Tang aruya aliba 26 Aonglenden Assembly Constituency bye election nung tokteptsü asoshi National People’s Party (NPP)-i par candidate asütsü O. Tinu Lkr shima pa nem ticket agütsüba sentong ka NPP Mokokchung District office nung March 23 nü meraketa agiogo. Iba den repsema ano O. Tinu’er kima NPP nisan (wako) asongba sentong ka agia liasü.
Iba sentong nung NPP tir, Ato Yepthomi-i anir state aser district level telen tabensa nungi lenirtem medema arua shilem agia denogo.
Sentong nung NPP tir, Ato-i jembidang, NPP legislator anadi O. Tinu Lkr nem ticket tagütsü ta ashi, aji oda, tenokdangba jenti liakasa, pa dak nübur lenitsü sempet tajung ajitetba den temulung lema party ticket-ji agütsütsü lemtet, ta ashi.
“O. Tinu Lkr ya nübur ajak den sakuku litetba lenir ka ta onoki ajitetogo, lenir kaji tangalen alir ka masü saka yangi alir ka shimtsüla, anungji, Aonglenden ama tongtibang constituency ka nungji pa ama lenir ka nungdaker”, ta paisa ashi.
“Aikadi onok party lenirtem mesüzüktsü merangdangogo, saka onok party tangatet (principle) nung akangakanga noktaka lir, iyongji tanü nenok den onok nübu medema aruogo”, ta paisa kuli agütsü.
Aonglenden bye election ya kanga dang tongtibang ka asütsü, aji oda, NPP-i koda timtem jenti ajuruaka O. Tinu Lkr nem party ticket agütsüogo, yamaji “onoki temulung lema ticket agütsüba ama paji adokdakjangma,” ta paisa mepishia metetdaktsü.
Iba osangbeneri NPP tir, Ato dang “NPP legislator anadi party toktsür NDPP nung züklokba ajanga nenok party dak kongshir mekongshir?” ta metetnüa asüngdangdang, “NPP ya national party ka lir, iba party ya tangatetba nung akangakanga noktakba aser nübur atema bendanga agütsütsü tenangzükba nung tentetba lir”, ta langzü. “Iyongji onok tangari mesüzüktsü merangaka, onok party tangatetba nung aser temelenshi bener arutsütsü nükjidong nung onok marakzüi noktaka lir”, ta paisa shisem.
Iba osangbenerisa “PDA telungjem nung NPP ya alliance ka ama küm ka alidang nenoki kechisa ajangshi?” ta metetnüa asüngdangdang, “parnok den legislator teimba liaka, PDA sorkarji tashi ita/kümküma mali, anungji, kodang laotsür ashitsü makok”, ta langzü.
Tanü iba sentong nung NPP candidate O. Tinu Lkr den NPP Mokokchung District tir I. Bendang, NPP Nagaland tongti zülur (Organization), Sasank Ghatraj parnokia mapang tatsütsü agia shilem agia jembi.
National People’s Party ya taoba Lok Sabha speaker aser union minister P.A Sangma-i anir tentetba telok ka lir aser tang NPP nung tirji Meghalaya Chief Minister, Conrad Sangma-i bena lir. March 29, 2019 nüji O. Tinu Lkr atema nübuyimtsütsü NPP tir, Conrad Sangma Ungma-i arutsü ta osang ajanga angazüker.