O tokteptsü sorkari melunga lir, PM-ia shilem agitsü: Naidu

New Delhi, November 30 (Agencies): Sen tamshidak anentsüba onük nung Parliament nung o tokteptsü atema sorkari melunga lir aser Ato kilonser, Narendra Modi-ia shilem agitsü, ta tanü Union Minister, M Venkaiah Naidu-i metetdaktsü.
Naidu-isa, linük nüburtemi sorkar telemtetba pusemer, ibayongji opposition party temi longkak aiter, ta ashi.
Information & Broadcasting, Urban Development, and Housing & Urban Poverty Alleviation Ministries nung pa minister lir, aser par ministry nung ketdangsertem nem digital transactions indang tesayuba agütsüba sülen osangbenertem den jembidang Naidu-i, sen 500 aser 1,000 notes anentsüba ya atangji, anungji iba maparen junga inyaktsü atema dang o lemteptsüla,” ta ashi.
“Parnoki (opposition party tem) Parliament-i arua o lemtepa o tokteptsüla aser linük tejakleni aotsü atema tebilemba onük tajung benoktsüla,” ta paisa ashi.
“Tangbo opposition lenir aikati parnoki black money aser demonetization anema menokdaker ta shiner, kechiyong Ato kilonseri agiba telemtebaji nüburtemi nungiter,” ta Union minister-i ashi.
Linük tesem ajungalen longkak aitba sentong tu tamakok ka liasü, ta paisa ashi.
“Parnoki (opposition parties) ka küma longjemnü, saka tangbo parnok rongnung telemsa lir, karibo iba telemtetba agiendaktsüner. Lalu (RJD tongti)-i tangatetba nungbo pai iba telemtetba manemer saka benokba inyakyim anemer ta jembiba ni osangkaket nung züngshiogo,” ta Naidu-i ashi.
Iba onük ya Parliament nung benoka lemteptsüla, aser iba atemaji sorkari melunga lir. “Tatem nung Ato kilonser aser Finance minister natia telangzüba agütsütsü,” ta pai ashi.
Naidu-isa, Parliament nung jembitsü atema tanga onüktem aser tongtibang ozüngtema lir, ta ashi.
Tanü Naidu den Minister of State for Information & Broadcasting, Rajyavardhan Rathore-a liasü.