O zülu atema tajungshi O den O semlok

– A. Maong Aier,
Retd G/T, Alongmen Ward, Mokokchung.

Taoba küm tatemlen ASLB-i asen oshi nung ita aser hopta tenüng teyuba sülen Wb. T. Penzüi ajak asoshi liromedema ita aser hopta tenüng asen oshi agi teratet shitak aser tongmelang agi adoktsüba to nübur aikadi junger ta jembitepba angashia iba to agi nung jungdisü ta ASLB dang asüngdanger. Ano ASLB-i sa khen nüngja 27 aser ano ken 27 oratet den o zülu dena adoktsüba nung nüngja ka atema o zülu meshitak züngshiba dak alaka tanüngba ajak shitak züngshi nung parnok dang pelaba shisemer. Nüngja ka nung o zülu tai ta putetbaji “SHITE O” (shisa tarok aketba o/oren) asen oshi olong tatembang ajak ‘I’ agi dang tema lir. Tanü asüng ‘E’ agi atemba olong kar nung züngshir. Engraji yakjang ‘I’ ya asen olasü nung ‘E’ ta adoker. Asen olasü nung ‘E’ ya ‘Ü’ ama adoker. Tat. tenüng-tatem-tembang-tetemsü-temoatsü-ken-khen etc. Anungji iba orrlem ozüngji meraksai o tarok nungi adeshia ork shiti/senti shiti mesura ano tanga nüngja tajungba ka amshi nung jungdisü ta asüngdanger. Mapang shia nübur aikadi olong 5 nung o zülu balala amshiba ngua ano tanaben metongshitsür. Shitakba agibo Ao nungi Aoer ta ang arur. No 5 ji bongu, No 9 ji tuku aser engraji oshi nung Owl ta alibaji asen o zülu nung bokpu ta ang arur. Saka ASLB-i April ita 10 2010 nung Ao oshi TENSENYIM-i o zülu atema Orrlem kaket ka adokba ozüng ajanga shitakba o züluji Aor, Bongo, Toku aser Bokbo ta ang amshitsü ta shia lir. Parnoki Aor, Toku ya tat. nung shia lir. Bokbo aser Bongo ana ya iba kaket nung Orrlem ozüng nung ajemdaker ni adokba sayur. Tai lira nenoki metongshijangma. Nüburtemi metettsü atema ojang 4 nung Aor ji dang Orrlem ozüng agi ashibaji sayur. Shitakba agibo tone olasü nung ajemdaker shisadangra ola ana (two syllables) adoker. AO-ER asenoki olasüji yamaji adoker. Saka Orrlem ozüngi ashibaji R aser ER agi atemba tebendang yamai shia lir. Ojang khar nung vowel inoktsü. Tat. Ao – Aor, Jami-Jamir, Tulo – Tulor etc. Ano ojang khar nung züluji consonant agi tena lira ER inoktsü. Tat. METET-METETER, RARATEP-RARATEPER, SANGTEM-SANGTEMER. Ni mezüng ashi ama tone olasübo raksatsür, saka olong khar dak alaka aika nung iba orrlem ozüng agi medentsür. Anungji ajaki liromedema Aor, bongo, toku aser bokbo ta amshidima. ASLB-i adokba kaket nung aika shitak lir, khar nung tai alibaji tone olasü nung aibelena lir. Item rongnung ni tat ka dang sayur. ‘Lung aser Long’ amshiyim ‘Lung’ kobasa lung (stone), telung (inside) aser temulungjang (heart) tetezü agütsür, item nung ‘lung’ amshitsü aser tanga ajak nung long amshitsü. Tat. Oren ana dang sayur, yangji lung aser long ajak inoka angutsü. Lung telong ka longa longa lur tzübu telongi ai. Ne mulungjang telung nung azü telong ka mejajar. Iba ozüng nung tone olasü raksatsür ka dang teratet sayur. ‘Lung’ (stone) iba ya olasüji ‘long’ ta ang adoker lower tone, saka long nungi lungren long nungi longpuk high tone ta adoker. Ano iba amaji Asetkong nungi Ongpangkung, Changkikong nungi Langpangkung ta aruba ama tone olasü amshia taruba adok nung yanglushi nung kanga dang ajungtsü. ASLB-i tajung inyakba atema tenüngsang agütsür, ano khar nung tai ama ajitetba nung temotongshitsü shia onük ya zülur type asütsüba yua ali nung ano taküm January ita date 4 nungi 12 tashi nung parnoki paper osang nung engraji zülo A to Z (f-q-v-x) amshia ojang khar den zülomen sayuba züngshia nübur ajak ratatepa yabo kanga dang majunga ta nemnemtpa alidang, Wb. S.T.Yapang Kohima, Wb. Talitemjen Dimapur aser Wb. R. Imkong Lkr 4th Mile Diphupar, parnoki majung ta o teratet den khuli tabensa agütsüba züngshia nüburtem temulung achiba angashi. Tashir nübur tajung asem tashi-i o tabensa shirji nibo iba onük nungibo medenli. ASLB-i kechi inyakdir inyakang ojang ta sür ali nung nübur aika kü dangi arua naia parnok den o semlokang ta kanga dang mepishia ashiba agi, nia parnok den o semloka iba onük ya dena zülusemer ta angatetdaktsüner. Tamapuri o tabensa shirji khar dak alaka ni oshilu mezülur.
Jungli oshi temeja nung ‘F’ aser ‘Q’ agi tenzükba olasü mali, aser o zülua mali. Tasen khar puralokbaji tebenja adokba dang asütsü aser oshia raksatsü. Tamapuri ashi ama F melen P agi yariteter, Q melena G aser K agi yariteter. X yagi X tesayur aser X Sannuker tabu aruteter. F ya abstract noun nung dang aruteter. Tat. Pentsü ozü-i few few ta asar, Alokbai few süa ken aten. Ano V atema tat. ka shidi. Khen bilembo V agi tenzüka vava menu-valunir-vasü nü- vakep-vajem-vadaka-vano etc. ta terabo mesüka arur. Saka iba yagi tenzükbaji lapi lapir. Iba jagi item olong nung W agi dang tenzüka aruba tang tashi kanga junga amshidagi. Anungji asenoki tanü putu nung item yakjang ya amshira oshi den o zülu ajak raksatsü, aser lanurtemia kodasür otsüla oboula nungertemi yamai adoka yutsü ta melenshitsü. Anungji luted ola kanga sashia adokdak ‘H’ ya amshidi aser tone agi melaba ama olasü den apet o zülu ya ang khen reprangshidi ta shia kü onük tembanger.