Oba, kanga pelar !

Tanü ya obalatem dang “kanga pelar” ta ashitsüba anogo lir. Aji oda, obalatem anogo ya obalatem asoshia pei taküm, pei jakla aser pei libaliro meyipa reprangdangba mapang tajung ka südaktsütsüla. Alima nung oba ta ajaba dak tema ajatsüsa nisung shinga mali, anungji obalaji ajak dang temaba jenjang nung lir. Aji oda, ajak asoshi obalaji chuba, kibur aser tesayur. Iba ama nisung ka mali tanur ka aientsübaji aser kibong ka alitsübaji tarendaktsüka aser azüngazünger. Iba jagi tanü ama tebu temeim anogo amongdang taküm alir  tebutem dang nungibo asür tebutem temenungraba menungraa bilemteter. Alima nung tebu kati alima aser kibong khuret abenbaji pai dang meteta lir. Pai pa taküm dang masü saka pa kinungtsü aser par tanurtem tangar menepa akümketa lidaktsüner, iba jagi kidang kenüa anisüngzüka mamonger. Tebu ka khuretji par kibong reprangtsüba mapa kija masü saka yimten, lokti aser arogo ajak nung shilem agitsüla. Aji oda, tebu kati shilem tajung agi nung dang yimten, lokti aser arogo ajakji tashi itta aotsü. Item nüngdak ajak atalokdaktsünü dang tebu ka taküm nung nübo talila adoktsüsa akümer, tenla aser saru talila agütsütsüsa akümer aser tali shisabolur. Ibayongji, kibong aika nung tetsü dang nungi tebu tama alima nungi piladokba ajurutsü. Talisa chirnutemi pei tebu jakla aser inyaksangshi reprangdangra pa tejangraba aser taginüba ajak agi par chirnurtem tajung kümdaktsünüba reprangtettsü. Par chir tajung kümdaktsünüba agi, pabo küm nung süoshia kata malitsü, chia mashi den chiyongtsü aser temang nungi aliba asentsü ajak yimtema mapa inyaktsü. Ajisüaka, mapa nung obala belemba mereprangtettsü. Pa aolen ajak nung pai pi rongnung pa kinungtsü aser par chirnurtem ajungba indang jembitsü. Aji oda, mejungika alinunga pa narongi pa kinungtsü aser tanurtem majungba indang jembiba manganür. Iba amaji obalai pei chirnurtem asoshi taküm ajak bendanga agüja anepaluaka, asenok chirnutem aikati obala dang “kanga pelar” ta  kena meshii obalatem aika leper nung rema toktsür asütsü. Kinungtsü aser chirnur aikati taküm alidangbo obala dang ‘takidak maka, tebur masü, tangari inyaktetba meinyaktetter aser tangari bener aruba bener marutetter’ ta tangar akaba memeneptet dang mezüngmeshia arütsür alitsü. Ajisüaka, tangar akaba memenepbaji obala takidak makaba agi masü aser tebur masü lapi asüba agia masü saka obala ochishir asüba agi, kechiyong ochishia bendenba rongsen agibo yakta takar makümer saka “temeshipur rongsen ishika akabaji tamajunger rongsen jenti akaba dang taoba,” ta Tenüngsang Ken 37: 16 nung shia angur. Tetezü ochishia bendenba rongsenji teimba- teimba küma senmang küma amshitsü saka ochimashi nungi bendenba rongsenbo asenoki repranga lia ayi ama kongadoktsü aser süngdong ama samatsü. Ibaji mangatet ser asenoki obala kanga mezüngmeshir asütsü. Aji oda, karibo pei tebu agi nümamedangteti alitsüa akok. Ajisüaka, shiba südir süang, obalaji obala. Asenoki medemer aser tembar aika shimtsü akok saka obalabo asenoki shimtsü makok, pa yabo ka dang aser paji Tsüngremi asenok den ken alitsü moatsüba taküm ka lir. Iba temoatsü aser maoangkaji angateta, asenoki obala dang ‘kanga pelar’ ta tebang agi ola adoka meshii lira, pa leperi maidangsa ashitsüla. Asenok aikati pei tsürabur taküm alidangbo merepranger aser mezüngmeshia amshir saka kodang südir ajep manener aser asüpila sentep nung o tajung aika ashir. Ajisüaka, ibaji amajok. Tsüraburtem dang o tajung ashitsü aser parnok dang meimtsü asoshi parnok asü matatsüla. Aji oda, tanga mapang nung obala dang kanga pelar ta meshiteti lira, tanü ya pa dang, ‘oba, nü temeim asoshi kanga pelar,’ ta ashitsüba mapang tajungtibaji lir. Ashiko, obala nunger karibo pei kinungtsü aser chirnurtem jashidakja alitsüa akok, kechiyong ajak kasa masü. Ajisüaka, obala tashimait den metoktepi Tsüngremi asenok dang ‘odang’ tai adokba ama asenoki pa dang, ‘oba , onoki nü dang tai adoker aser onoki na meimer,” ta ashitsü anogojia tanüsa tajungtiba asütsü. Oba, kanga pelar; Oba, onoki na kanga meimer; Oba, onoki nü dang tai adoker ta ashiba oa jagi obala tenük nungi nüktzü aludaktsütsü aser iba nüktzüji asenok ajak asoshi Obala anogo nung anguba sempet aser temoatsü tulutiba asütsü.