OBALA TEMEIMJI MASETSHILONG

– C. Lima Ozüküm, Mongsenyimti

Oh ! tasü tait aküm taket Obalatem,
Kechaia malizüktetba tanü ne anogo
Yimti nung nanüng ola ya angangjo!
Hauni, ya ne tetushi alisanger ola-a ni.
Tzüngyi, tsüngmok, yipru tesashi ijepji süaka
Obala aküm küpok jenoker tsübu mali,
Kodanga kecha metoktsü aji obala temeim
Teronem Liangmesen rongma-a aor
Obala meimbo tatem maka ojen aor
Hon, Taribi dena metemdangtsü makok, Obala meimji lir.
Ayatai! Bendangli süa pokyimsang to na,
Tepangmechi rangaranga konger tenem longren kübok,
Tesempar molung nettsü arem min nung,
Ali nung taso meshizük kaoa rongjensetera na.
Pur medemsor memenepi arishi atsüsang,
Hoi! Hoi! ta tsüngküm mongpu taru-tao memetet
Koremseta akumli taso meshizüki rokongsang,
Nüktzü meyima neter menüa sayusang
Hoi! ta metsü pereper maka maki bushisang
Tanü ne aküm küpok ozüi na naklu, walu tentsürako.
Anü merema talur obala ki matong,
Ankongpang nung tanemi ayaketer, lulaseter
Maka mait bilemdang ayip majang.
Kechiang mesayang takar kidangi odanger
Menürema kitong yongya-a ilonga asemer,
Atepzüng longa mener obala aru atar.
Anojungi koktata akümer, taküm lenmang mangu
Akümli atura süitema omar
Teka tazüng süaka Tsüngrem dak metaloker
Lajar ka metem Tsüngremer yongsük sangwa lenmangi aniangma.
Obala rongtongji jungti danga taoba
Obala tashi akayitsü lenmang ngudima ?
Ita Petinu tongtet, ne nükla nung
Longrunen ki metem, ne meim shibai nemtemtsü
Ayimtena tushitsü tanü mapang masü no!
Kibong rangpen kümzüker Noai ani metem
Alima ajak kümzüktsü Oba ne dak tashi lirko.
Tsüngremr noklang nok Pa tashi nung apur
Kotak kiküm tonga sentsüwangshia aniangma
Teyanglur Tsüngremi Obala taküm maneni moajangma. AMEN