Obama aser Bush nati US telemsa indang jembi

Washington, October 20 (Agencies): Taoba US Tir Barack Obama aser George W Busg nati US nung tang yimden yimsüsüba tensa atema süoki ia bilemba o jembiogo.
Obamai-i America nunger dang telemsa adokdaktsüba aser tetsübu aketba yimya magizüktsü ajungshi aser Bush-i lokti nung kati ka ashioktsüba aser pei atema dang bilemba aitsü.
Tenaprong ya tesem balala nung jembiba lir aser tena katia Tir Trump tenüng mamshi.
Obama aser Trump nati jembiba ken o nung Trump-i anu kicha mashi lir.
Taoba tir temi teti lokti nung tang teinyakdak aliba tir anema mejembir aser Obama-i office toktsüba mapang George W Bush-i pa dang yariba ama Trump den yariteptsü, ta ashi.
Trump-i Obamacare sentong raksatsütsü merangba, tashishitsü aketba Muslim nunger nem US-i marutsü atema tenokdangba agütsüba aser Paris Climate tezüngzüktep toktsütsü asoshi telemtetba agiba mapang Obama-i ola madoki meliasü.
Newark, New Jersey nung Democratic telok nübuyim nung jembidang Obama-i, “America nungeri alima dang onoki telemsa aketba politics magizüker aser tetsübu aketba politics magizüker, ta osang sangdongtsüla,” ta ashi.
“Putu aikab tejaklen nungi amshia aruba telemsa aketba yimdenren asenoki mamshitsüla. Yimdenren kar asenoki tang anguba nung asenoki itemji anendaktsütsü amai bilem. Parnoki tesüiba küm 50 nung rangloka lir. Ibai 19buba Century masü, ibai 21buba Century lir,” ta Obama-i ashi.
Iba sülen pai Richmond, Virginia nung jembidanga kasa onük amshia jembi. “Asenok den nisung kar lir aser parnoki tangar dem jashidaktsütsü meranger, tebilemba balala aliba nisungtem melungjang menentsütsü meranger, aser iba ajanga tajangzük mapang tatsüka atema dang angur,” ta taoba tir-i ashi.
Obama-i iba o mejembidang New York nung Bush-i jembidang, “Pei dang agitsü bilemba molungsentsü tuluba kümogo. Asen yimdenren ya mangatettep aliba ‘theory’ tem den mesüktepa kümdagi aser ochimashi agi sünga lir. Democracy busemba tajemba akümba yimya ngudagi – talisa lanurtem rongnung lir,” ta ashi.
“Taochi maliba yimya agi asen linük süngogo aser iba ajanga asenok ka küma lungjemdaktsüba dangbo sadangdaktsüba tashi tuluba kümogo. Linük meimba raksaja pei tasodak tesem meiba timba kümogo,” ta Bush-i ashi.
Taoba mapang Tir Trump-i Obama aser Bush aija aruogo.
Taoba tir temi tang tashi lokti nung Trump indang sentong anema jembia mali.
Taoba küm election magidang Trump-i Obama aser Bush naprongla aija aruogo aser tena ya US puti otsü nung tir tamajungtiba ana lir, ta shia liasü.
January nung Trump tir mendeni atoba sülen pai ken o aika nung o mükemdangi jembiba aser pa indang inyakyim ajanga Democrats aser Republicans telok nung mangatettep adok.
Pai teti media aija aru aser media temi pai takok ngua inyaktetba nung masü saka taila osang nung dang temulung agütsür, ta ashi.
Taoba tir Barack Obama-i tang tashi nüburtem atsüa arua jembitsü meteta lir aser pai o jembitsü ghonda aika lia nüburtem adenshia liasü.