Obama aser Xi na linük ana tesendaktep atema jembi

November 19, 2016 nü Lima, Peru nung Asia-Pacific Economic Cooperation (APEC) senden nung U.S. Tir Barack Obama (Achiji) aser China Tir Xi Jingping (Abelen) na den tanagrtem ajurutepba senden amenba noksa nung angur.

Lima, November 20 (Agencies) : US Tir Barack Obama aser China Tir Xi Jinping nati taruba mapangtem nungibo linük ana tsüngda shishilembaba, tebilemba tasentem aser meimchir temeten imyakyimtem dena maparen ajak nung tesendaktep tali tashi itshitsü imlar.
Obama aser Xi na ya Deobarnü tembangtsü aliba Asia-Pacific Economic Cooperation (APEC) nung lenirtem senden amenba mapang Honibarnü Peru yimtiba Lima yimti nung ajurutepa liasü, ta Efe osang ajanga ashi.
XI-i, linük ana tsüngda tang tesendaktep ya tera anokshidar ajisüaka tajungba akümtsü imlar, ta tang US Tir asütsü shima alisang, Trump tenüng metetshi ashi.
US aser China na tesendaktepji kanga tongtibang lir, ta Obama-i ashi.
Tan agi China Tir den tokuben ajurutepsang, Obama-i, tang linük ana mangatettepi alibatem atema khen ajurutepa kanga junga sensaksem akatsü imla atar, ta shisem.
Pai, tesüiba küm ishika tsüngda nung linük ana tsüngda tesendaktep kanga junga akümba ajanga Iran-i nuclear yanglutsü aliba nokdangtetba den ano Ebola wara aser tzü mopung melenshiba den rarateta alima nung tajangzük tulu bener aruogo, ta ashi.
US aser China na lungjemba ajanga alima tzü mopung melenshiba tsütsü terenlok bener aru ta ashidang, Obama-i, linük ana ya lungjemer inyaktsü lemtetba ajanga alima atema kechi inyakteter ibaji sayuogo, ta ashi.
North America leniri alima nung rongsenkettsüng tsütsü tashi taitiba linük ana teinyaktsü mapatem tenüng teta yuogo. Item rongnungji Paris Agreement den liro medema tangatettep nung inyakteptsü dena lir.
Pai, US aser China nati North Korea nungeri inyakba tem anema külemi lungjemer nokdaker, ta ashi.
Xi-i, “China aser Obama-i aniba US linük na tsüngda tesendaktep ajungba ajanga mulungtok sensaksema akaba aser tzü mopung melenshiba den Korea inyakyim tsütsü maneni terenlok lia inyaktetbaji lir, ta ashi.