Obama-i 21st Century Cures Act ozüng küma agizükogo

Washington yimtiba kübok White House auditorium nung US Tir, Barack Obama-i pai maitsü ajenokja, 21st Century Cures Act onük ozüng küma agizükba noksa nung angur. (Washington, December 14)

Washington, December 14 (Agencies): United States Tir, Barack Obama-i cancer tashidak den sentakba research agitsü, ozüng alema mozü mora achirtem tanaben aneptsütsü aser tekolok meshidaki alirtem nem nungdakba teyari agütsütsü onük ozüng küma tanü, Bodbar nü agizükogo.
Obama-i tan dollar sen billion 6.3 jenjang aketba teyari agütsütsü onük agizükbaji pai Tir menden toktsüba jakdang tatembangba onük ozüng küma agizüker asütsü akok.
“Asen nübur aikati bilemba ama, asen linük cancer tashidak meshimeshia samatsütetba linük kümdaktsütsü alizüng nia yua lir aser tarutsü anogotem nung iba alizüng asangsang nung ajangzüktettsü imlar,” ta pai pa maitsü ajenokja, onük agizükba sülen Obama-i metetdaktsü.
Washington yimtiba kübok White House auditorium nung sentong tajung ka agia, Obama-i 21st Century Cures Act onükji ozüng küma agizüka liasü.
Tan teyari agütsütsü asoshi agizükba teyari sen nungi sen billion 1.8 tashi cancer tashidak den sentakba research agitsü atema renemja lir aser iba teyari nem taoba 2015 küm tekolok cancer tashidak agi shiranga asüsang, US Tatong Tir, Joe Biden’er jabaso, Beau nüngtem nung ‘Cancer Moonshot’ jaloktsüogo.
“Tan 21st Century Cures Act ozüng küm agizükba ajanga nisung jenti taküm kümzüktsütsü. Iba ozüng agizükba kisüngi America nunger nisung million jenti nem teimla tasen agütsür lir,” ta Biden-ia tanü sentong nung metetdaktsü.
Tanü sentong nung taküm 2016 küm March ita opioid overdose agi jala asür, taoba West Virginia state senator, David Grubb aser pa kinüngtsü, Kate nata densema liasü.
Tan ozüng küma agizükba sülen 21st Century Cures Act mapatong kübok tekolok research agitsü atema sen billion 1.5, mozü mora tajung yanglutsü atema sen billion 1.4 aser heroin o opioid densema, ozüng alema mozü mora achirtem taküm tajungba küma melenshitsütsü atema sen billion 1 densema, nübur temang anema lidaktsütsü mapatong balala nem taruba küm 7 tashi nungdakba senotsü teyari agütsütsü renema lir.