Obama-i Asia lenirtem den N Korea den sentakba ken o benoker

US kübok Washington yimti nung amenba Nuclear Security Summit senden nung US Tir, Barack Obama (Tiyongtsü)-i South Korea Tir, Park Guen-hye (Abelen) aser Japan Ato Kilonser, Shinzo Abe na den aroki shilem agidang agiba noksa yangi angur. (Washington, April 01)

Washington, April 01 (Agencies): US Tir, Barack Obama-i Japan, China aser South Korea nunger densemba Asia lenirtem den ajurutepa North Korea-i tenzüka aliba nuclear mapatong den sentakba onük tongtipangsüa benoka jembiogo.
Pyongyang-i United Nations Security Council (UNSC) telemtetbaren anema inyaka, par tongpang nung amshitsü ballistic missile ishiben tendanga kadokba sülen Obama-i Asia lenirtem den ajurutepa parnoki N Korea den sentakba onük ya benoker lir.
Obama-i China Tir, Xi Jinping den yashi Brehostibar nü ajurutepa jurila senden ka amendang United Nations (UN)-i Pyongyang anema benokba tenokdangba sentongtem ajunga mapa küma inyakdaktsütsü aser Korean Peninsula nung tongpang nung amshitsü nuclear osettsüset yanglua rizüngtsü maparen anentsütsü bangjema liasü.
Obama-i tanü, Hokolbar nüa S Korea Tir, Park Guen-hye aser Japan Ato Kilonser, Shinzo Abe na dena ajurutepa N Korea den sentakba onük tongtipangsüa benoka liasü.
Washington yimtiba nung yashi aser tanü na amenba Nuclear Security Summit senden tezülen Obama-i Asia lenirtem den ajurutepa par jurila senden amener lir.
Northeast Asia nung tensa tajungba kümdakja yimji yimjung bener arutsütsü maparen amalitepa inyaktsü, N Korea’er nuclear mapatong anentsütsü aser Korean Peninsula nung tongpang nung amshitsü nuclear osettsüset yanglua kasaji rizüngtsü maparen nokdangtsü telemtetba tanü lenirtemi agiba osang jangjaogo.
Ano, alima tali tatsükba akümba ajanga tsüngsang mupong balaka küma melenshidaktsüba, cancer tashidak den sentakba research agitsü aser kiralongrartem anema aroki lungjemer raratsü asoshi lenirtemi tanü nangzüktepa liasü.
Obama o Xi natia alima tsüngsang mupong balaka akümbaren, cybersecuitry, ozüng alema nisung shibelenbaren  azüoktsü nangzüktepba den külemi, China aser kidangsüa aliba linüktem rong nung adokba South China Sea  mangatettep ken o den sentakba onüka benoka jembiba osang jangjaogo.