Obama-i Asia lenirtem den N Korea’er nuclear onük benoka jembitsü

Washington, March 29 (Agencies): US Tir, Barack Obama-i China, Japan aser South Korea lenirtem den tan hopta ajurutepa North Korea-i tenzüka aliba nuclear mapatong den sentakba onük benoka jembiteptsü sentong renemogo.

Washington yimti nung tan March ita tatembanglen aser taruba April ita tetenzüklen amentsü ayongba 4 buba Global Nuclear Security Summit tezülen Japan Ato Kilonser, Shinzo Abe aser S Korea Tir, Park Geun-hye na den senden ka aser China Tir, Xi Jinping den senden tanga ka tan Brehostibar nü amentsü asoshi Obama-i sentong renema lir.

Solid-fuel rocket aser anünglak tonga kaketa yokba sülen timtem kecha majurui ballistic missile alimai tanaben aludaktsütetba densema, N Korea-i par tongpang nung amshitsü nuclear osettset aser ballistic missile yanglua rizüngtsü matong nung terenlok tulu anguba osang tawa metetdaktsüogo.

Par nuclear mapatong nung terenlok aliba osang sangoktsüba den külemi, N Korea mitkartemi par long-range aser short-range missile ishika Sea of Japan nung tendanga kadokba osanga bushiteta lir.

Par linüki United Nations (UN)-i agiba telemtetba anema inyakba nem telangzüba agüja, UN aser US nati Pyongyang anema tenokdangba sentong tasen ishika benokogo.

US den külemi, China, S Korea, Russia, Japan aser N Korea nunger densemba linük 6-i aroki lungjemer Pyongyang’er nuclear mapatong anentsütsü maparen tenzük saka iba mapatongjia 2008 küm anenadoktsüsa aküm.

Ano külen, N Korea mitkartemi par short-range missile ka Wonan yimti nungi tanü kadokba sülen missile-ji kilometer 200 shi pilar par linük anüdoklen tzüyimküm nung pokdokba osang ka S Korea-i metetdaktsüogo.

US aser S Korea mitkartemi loktepa agiba teloktep mitkar terenemshitsü sentong anemer ta sayutsü nükjidong nung Pyongyang-i par missile kadokba osang jangjaogo ta S Korea mitkar lenisangi osang jangjashitsü.