Obama-i Asia semdangtsü mapatong tenzüker

Washington, May 21 (Agencies): US Tir, Barack Obama-i hopta ka agia Asia nung tentetba linük 2 tashi semdangtsü nükjidong nung Washington yimtiba tanü, Honibar nü toktsüogo.
Obama-i Tir menden benokba sülen tan agi Asia 10 benbuba semdanger küma, Vietnam mezüng semdangba sülen maneni tan May ita 21-28 nü tashi Japan semdangtsü sentong renema lir.
Obama-i tan Asia semdangdang Asia lenirtem den rongsenren aser tensa azüoktsü onüktem tongtipangsüa benoka jembitsü sentong renemba osang ka White House-ia metetdaktsüogo.
Obama-i Vietnam yimtiba, Hanoi taruba Hombar nü tonga aotsü aser Vietnam lenirtem den rongsenren aser tensa azüoktsü onüktem benoka jembiba den külemi, par US aser Vietnam na tsüngda tanaben sentaktepshitsü onüka benoktsü sentong renema lir.
Pai Hanoi aser Ho Chi Minh City na semdangdang tetsükdakba kechi meli shishilembatsü asoshi benokba Trans-Pacific Partnership (TPP) mapatonga takok ngua inyaktsü asoshi nungdakba maparen inyaktsü renemogo.
Vietnam semdangba sülen, Obama-i Japan semdanga Japan kübok Ise-Shima nung amentsü ayongba Group of Seven (G7) senden nung shilem agitsü aser Japan Ato Kilonser, Shinzo Abe den aroki 1 buba atom bomb tsükdaktsüba yimti, Hiroshima semdangtsü.
Ano külen, Syria nung tentetba kiralongrar anema aroki lungjemer raratsü asoshi Russia-i benokba onük magizüktsü lemtetba osang ka Pentagon-ia metetdaktsüogo.
Par linük ana mitkartemi tayimtsü amshia al-Qaeda telok den sentaktepba kiralongrar anema aroki raratsü asoshi Russia Defense Minister, Sergei Shoigu-i yashi, Hokolbar nü onük benok saka Pentagon-i iba onükji magizüktsü lemtetogo.
“Syria Tir, Bashar al-Assad-i aniba Syria sorkar den amalitepa, par linük tentetba kiralongrar anema aroki lungjemer raratsü asoshi Russia defense minister, Shoigu-i onük benok saka Russia den aroki lungjemer Syria nung tentetba kiralongrar anema meraratsü lemtetogo,” ta Pentagon otongdar, captain Jeff Davis-i osang jangjashitsü.
Russia-i tashiyim agi Ukraine nungi Crimea peninsula agiba sülen US-i Russia den mitkar tesendaktep ajunga raksaba osang bushiteta lir.
Syria den sentakba mangatettep ken o bentettsütsü asoshi Austria yimtiba, Vienna nung tang hopta tetenzüklen senden amenba International Syria Support Group (ISSG) telok nung US aser Russia naprong densema lir.
Ajisüaka, US-i Assad Syria Tir menden nungi anentsü akhangba ajanga par linük o Assad pusemba Russia linük na tsüngda Syria den sentakba onük nung tangatettep kati maruteti lir.