Obama-i China Tir, Xi Jinping den White House nung ajuruteper

Washington, September 25 (Agencies): US Tir, Barack Obama-i par linük semdangsang, China Tir, Xi Jinping den tanü Hokolbar nü Washington kübok White House nung ajurutepogo.
Xi nem ’21-gun salute’ aküm agüja pa pela agizükba sülen Obama o Xi nati China-i ozüng alema internet den sentakba osangtsüsangtem miima agiba, Beijing-i inyaktsü tenzükba rongsenren maparen aser South China Sea den sentakba mangatettep ken o densemba tongti onüktem benoka jembiba osang jangjaogo.
China Tir menden benokba sülen tan mezüngsüa US semdangsang, Xi-i Seattle yimti nung tongti shishilembartem den ajurutepa senden balala amenba sülen yashi, Brehostibar nü Washington tonga ao.
Obama o Xi nati yasüng, Brehostibar aonunga White House nungsa ajurutepa külemi chiyonga par linük ana tsüngda adokba mangatettep onüktem benoka jembiba osanga jangjaogo.
Lenir anati tanü ajurutepdang alima tali tatsükba akümba ajanga tsüngsang mupong balaka küma melenshibaren azüoktsü mapatong nung par linük anati tongti shilem agitsü nangzüktepba osang ka White House press secretary, Josh Earnest-ia metetdaktsü.
Iba den sentaktepa, alima ajunga nung nütsüng yongsük timba aliba linük, China-i mim aketba carbon tango tajemba adoktsütsü nükjidong nung Xi-i tanü shishilembaba mapatong ka lapokja liasü.
“China-i ozüng alema internet ajanga osangtsüsangtem miim agiba atema tebilemtsü kaa, iba onük nung ajemdaker China anema tenokdangba sentong benoktsü renemba olen ka ozü Tir, Obama-i tanü China lenisang dang metetdaktsüogo,” ta State Department otongdar, John Kirby-ia metetdaktsü.
Ano külen, China-i par linük den kidangsüa aliba Philippines, Vietnam, Malaysia, Brunei aser Taiwan linüktem jashidaktsütsüsa South China Sea nung tashishitsü maparen inyakba anentsü tajungshiba olen ka Obama-i tanü Xi den lemsatepa liasü.
Ajisüaka, par linüki Spratly Islands ta ajaba South China Sea tzüyim nung densemba asetkong ishikaji alemli nungi par meyong süa aru ta shia, par linüki inyakba maparen metentsüba olen ka Xi-ia tanü metetdaktsü.