Obama-i Cuba nung US Factory tentettsü onük agizüker

Washington, February 16 (Agencies): United States aser Cuba na tsüngda sentaktepshitsü mera tejakleni agia, Cuba nung US sensotemi ketdang asüba factory ka tentettsü onük US Tir, Barack Obama-i agizükogo.
Obama-i pa maitsü ajenokja tan onük agizükba sülen küm 50 shi nung tan mezüngsüa Cuba nung US factory ka tentettsü renemer lir.
US kübok Alabama nung tentetba tractor gari tila yanglur telok kati Cuba nung tractor factory tenteta Cuba nunger ayangertem nübo alizüka sangküm, 2017 küm tashi nung tractor 1000 shi yanglutsü alizüng ayuba osang jangjaogo.
Tan factory tentettsü renemba ya tesüiba Cuba lenisang, Fidel Castro-i 1959 küm Cuba Ato Kilonser akümba sülenbo US nung tentetba shishilembatsü telok kati tan mezüngsüa Cuba nung par shishilembadak tenteter alitsü.
US anülulentip tsütsülen, Alabama nung tentetba Cleber company kibur, Horace Clemmons aser Saul Berenthal nati Cuba nung tractor factory-ji tentettsü renema lir aser US sorkaria par telok nem Cuba nung factory tentettsü melaba osang metetdaktsüogo.
“Küm 60 shi tesendaktep mejungi aliba linük ana aser par nüburtem tanaben sentaktepshitsüren nung shilem agitsü maongka anguba atema kanga pelar,” ta Berenthal-i metetdaktsü.
“Nisung aikati Cuba den shishilembaba ajanga tajangzük angutsü meranger. Ajisüaka, ozü teloki Cuba nüburtem ajangzükdaktsütsü alizüng yua lir,” ta Clemmons-ia metetdaktsü.
Tesüiba küm 50 shi tesendaktep kanga mejungi lir külen Cuba Tir, Raul Castro aser Obama nati par linük ana tanaben sentaktepshitsü lemtetba osang ka 2014 küm tatembanglen alima dang sangoktsüba sülen Cuba aser US na tsüngda tang tesendaktep tajungba akümtsü tenzüka lir.
Ano külen, Cuba yimtiba, Havana kübok economic zone nung tan factory tasenbaji tentetdaktsütsü asoshi Cuba sorkaria dollar sen million 10 shi jenjang aketba mapatong tenzükba osanga jangjaogo.
1959 sülen tan mezüngsüa Cuba aser US na tsüngda tayimtsü senzü tenzüktsü tenzüngzüktepa Cuba aser US sorkar nati agitsü renemba osang angazükogo.

You must be logged in to post a comment Login