Obama-i Dalai Lama den White House nung ajurutep

White House, June 16 (Agencies): US Tir, Barack Obama-i Tibet nunger tanülar lenisang, Dalai Lama den White House kübok Map Room takdang telung nung ajurutepa senden amenba osang angazükogo.
China-i majuruteptsü amokmeren aka, Map Room takdang telung nung osangbener aser noksa tangoker nisung ka danga maitdaktsüi Obama-i tan agi Lama den 4 buba ajurutepa liasü.
Ajisüaka, tenati takdang telung nung senden amenba jakdang Obama aser Lama na ajurutepba noksa ka White House-i alima den lemsatepogo.
“US lenisang, Obama-i tan Lama ajurutepbaji lenir ka ama masü saka tembar ka ama aser alima ajungai agizükba tamangba yimsü lenir ka ama ajurutepogo. Yamaji masü ka asübo, White House kimlen, South Lawn nung Lama nem tetushi agütsüba sentong agiba den külemi, Obama-i pa den Oval Office takdang nung ang ajurutepa sendenji amentsü liasü,” ta US’er Asia National Security Council otongdar, Myles Caggins-i osang jangjashitsü.
“Obama-i Dalia Lama den ajurutepba ajanga China anema nokdaker Tibet nüburtem tali temulung uluja parnoki China anema taoba mapang nungi tesashiba nokdaktsü. Ano, Obama-i Lama den ajurutepba ajanga China aser US na tesendaktepa mejungi akümtsü ana nung dang lir,” ta shia, Obama-i Lama den majuruteptsü amokmerenba olen ka China foreign ministry otongdar, Lu Kang-i yashi, Bodbar nü metetdakja liasü.
Tibet China yimli nungi nüchiso ngudakja linük tasen ka tentetdaktsütsü meranger lenir ka ta China-i Lama züngshiba yong Obama-i Lama den ajurutepba ajanga par China nem timtem bener arutsütsü ta tsüboa, China-i Obama o Lama na majurutepdaktsüi nokdangtsü meranger lir.
“Lama ya kü tembar tajung ka lir,” ta shia, Obama-i tesüsa, 2014 küm Lama den ajurutepa senden amenba ajanga China kanga jashidaktsüba osang bushiteta lir.
“Ozü lenisang, Obama-i Lama den tanü ajurutepdang tawa US kübok Orlando nung tentetba nightclub nung nisung aika khen nung tepsetba atema sasa bilemba osang Lama-i lemsatepba atema pela olen ka lemsatepa liasü. Ano, mangatettep ken o ajunga meraratepi jembitepba ajanga bentettsü aser alima tsüngsang mupong balaka küma melenshibaren azüoktsü asoshi Lama-i nungdakba maparen inyakba atema pelaba osang Obama-i lemsatepogo,” ta White House press secretary, Josh Earnest-ia metetdaktsü.
“Ozü Tir, Obama aser Lama nati China kübok alir Tibet nüburtem indang taküm tia den sentakba onük benoka jembiogo aser Tibet nunger sobaliba, tamangba yimsü aser oshioben wazüka ayutsüren nung US-i nungitsü asoshi Obama-i nangzüka liasü,” ta White House-ia sangdong ka ajanga metetdaktsü.
Tibet nem nüchiso agütsütsü atema masü saka peisasa pei madak yimsü asütsü tashi tuluba agütsütsü asoshi Lama-i China den takhangba benoka lir.