Obama-i Europe & Latin America semdangtsü

Washington, October 26 (Agencies): US Tir tasenba shimtsü election taruba November ita 8 nü agiba sülen tanabuba hopta nung US Tir, Barack Obama-i Europe aser Latin America na semdangtsü sentong renemba osang ka White House-i tanü, Bodbar nü metetdaktsüogo.
Obama-i tan Europe aser Latin America na semdangtsü renemba ya pai US Tir menden taruba 2017 küm January ita toktsüba jakdang US Tir ka ama tatemsüsa bendang linük semdanger alitsü.
“Ozü lenisang, Obama-i Greece taruba November ita 15 nü semdanga, par Tir, Procopis Pavlopoulos aser Ato Kilonser,  Alexis Tsipras na den Greece’er rongsenren tensa aser Europe nung jenoka alir refugee nisungtem den sentakba onük benoka jembitsü sentong lir,” ta White House-i osang jangjashitsü.
Obama-i maneni Germany Chancellor, Angela Merkel dena November ita 17 nü ajurutepa, shishilembatsü, Ukraine, Syria aser Islamic State kiralongrar telok den sentakba onüktem benoka jembitsü sentong lir.
Pai Merkel den aroki lungjemer France, Britain asr Italy lenirtem dena teloktep senden ka amentsü renema lir.
Obama-i tatemsüa, November 18 nü Peru semdanga idakji amentsü ayongba Asia Pacific Economic Cooperation senden nung shilem agitsü renemba osang jangjaogo.