Obama-i Indian-American scientist 4 presidential awards atema shimogo

Washington, January 10 (Agencies) : Tanü Mongubarnü US Tir Barack Obama-i Indian-American scientists 4 nem science aser engineering mongintem tushiba sempet tulutiba agütsütsü shimtetogo.
Parnok pezü tenüng ya Presidential Early Career Awards for Scientists and Engineers (PECASE) tarensen nung aliba nisung 102 rongnung densema liasü.
Parnok pezüji Montclair State University nungi Pankaj Lal, Northeastern University nungi Kaushik Chowdhury, Mount Sinai nung Icahn School of Medicine nungi Manish Arora aser University of California, Los Angeles nungi Aradhna Tripati nungertem lir.
United States sorkari science aser engineering atema agütsüba tetushi tulutibaji ibai lir.
“Ni scientists aser engineers tangar ajak dang alakteta ajungertem, item scientist 4 mapang tajung asoshi tenüngsang tulu agütsür,” ta Obama-i ashi.
“Parnok pezü yagi United States tanü asüng tensa den liro medema litetsüsa teinyaktetba tasen meranga inyaker aser parnok inyakyim ajanga linüki science aser terenlok atema invest asüba agi asen meketa aliba lima indang shisatsü lazüka linük rongsenkettsüng nung teyari agütsür,” ta Obama-i ashi.
Presidential Early Career Awards ya 1996 küm US Tir Bill Clinton-i tenzüka yutsü aser iba sempet ya ajanga America nung kechisarena tasen yanglutetba tsütsü tali ajungmesoa US rongsenkettsüng aiener aser tebilemtsütem koktetba nung yarir, ta White House-i ashi.