Obama-i Japan PM, Abe den sasaba olen ka lemsateper

Tokyo, August 26 (Agencies): United States (US) sorkari tongti Japan ketdangsertem nungi ozüng alema miim osangtsüsang agir ta tawa WikiLeaks-i yimjak nung sangdongba atema sasa bilemba olen ka US Tir, Barack Obama-i Japan Ato Kilonser, Shinzo Abe den telephone ajanga tanü Bodbar nü lemsatepogo.

WikiLeaks-i iba osang yimjak nung sangoktsüba ajanga Abe aser pai aniba Japan sorkar nem timtem jenti bener arutsü aser kasaji atema sasa bilemba olen ka Obama-i tanü metetdaktsü ta Japan sorkar ketdangser kati metetdaktsü.

Obama o Abe nati tanep minute 40 shi agia telephone ajanga jembitepa liasü.

Alima sabang nung shishilembabaren aser alima tsüngsang mupong balaka küma melenshiba nung Japan tebilemba aser sentongtem densemba osang US National Security Agency (NSA)-i ozüng alema miima agiba osang ka WikiLeads-i internet ajanga alima dang sangoktsüba sülen osangbener aser Japan parliament-i Japan ketdangser jenti den tasüngdangbaren tenzüka liasü.

NSA ketdangsertemi Japan nunger tongti ketdangser 35 shi telephone ajanga jembishinüba den sentakba miim osangtsüsang agiba osanga WikiLeads-i internet ajanga prokshiba osang bushiteta lir.

Tamendakdak maliba olulu prokshiba ajanga par linük ana tsüngda tesendaktep mejungi kümdaktsütsü, ta shia, Abe-i taoba mapang benokba ama, WikiLeads-i prokshiba osang jangjashitsü atema nungdakba bushisüngdang agitsü asoshi Abe-ia tanü metetdaktsü.

Obama o Abe nati alima sabang nung rongsenren jenjang mejungi akümba, North Korea aser alima tsüngsang mupong balaka küma melenshiba den sentakba onüka tanü benoka jembiba osang jangjaogo.