Obama-i Joe Biden nem Presidential Medal of Freedom agütsü

Washington, January 13 (Agencies) : Mapang agi tonger tang US Tir menden nungi alutsü alisang Tir Barack Obama-i linük Tatong Tir Joe Biden nem aoksaa ‘Presidential Medal of Freedom’ agütsü. Iba sempet ya linük nung civilian sempettem rongnung tulutiba lir.
Obama-i iba sempet agütsüba mapang Joe Biden dang kü adianu ta aja aser America nung Tatong Tir inyaka arur rongnung tajungtiba ta ashi.
Tir-i Brishostibarnü Biden aser pa kinungtsü Jill na dang pa tepila salem ashitsü ta shia White House-i jaok, ajisüaka pai tena par tembartem, kinungertem aser külem inyakertem sünga mena aliba takdang kati anir ia iba senpet aoksaa agütsü, ta New York Times osangkaket nung shia lir.
Tesüiba Tir temibo iba akhümket sempet ya Pope John Paul II aser Colin L. Powell nunger amala nem ang agüja liasü saka Obama-i tan mezüngsüa tatong Tir nem agütsü, ta tesüiba mapang Secretary of State-i ashi.
“Joe Biden metetbaji ochi temeim metetba mesüka lir,” ta Obama-i ashiba mapang Biden tenük nungi nüktzü alua romal ka agi pa teni aidoka liasü. Iba sentong ya television nunga sayuogo.
Obama ya ajak nung ajak aser tangar nüngdak ajak pa nija nüngdak amai agiba tangatet aketba nisung ka lir, ta Biden-i ashi.
Iba sentong ya 2008 küm nungi metetepa aruba lenir ana kanga anasatepa akümba tembangba sentong ka mesüka liasü.
“Ni ajaki züngshiba nisung ka den külemi inyakshimogo ta ni shiteter. Pai asen linük asoshi mapa tulu jenti inyakogo, ta Biden-i ashi.