Obama-i Kanye West nem Tir ka asütsü atema tesayuba agütsü

October 11, 2015: San Francisco nung tenla bendenba sentong ka nung rap kentener Yeezy-i (Kanye West) shilem agia liasü aser iba sentong nung US Tir Barak Obama-i pa nem yimtenren tsütsü tesayuba kar agütsü.
Kanye West-i tawato 2020 kümbo pa Tir atema election nung tokteptsü ta sangdonga liasü.
California nung Honibar anepdang (Oct. 10) tenla bendenba sentong ka nung adener nisung 1,300 jakdang Obama-i o jembia liasü aser kasa sentong nung Kanye-a pa o jembiba sülen ken ajanga shilem agiogo.
MTV VMA sentong August ita nung akaba mapang rap ken atensangi US nung temaba menden asoshi tokteptsü metetdaktsü aser Obama-i iba tsütsü tera sentaka jembia liasü.
“Tang nungi mapang tatsüka dang lir külen nenoki politics nung shilem agitsü mulungteter alir kentener kati shilem agiba angutsü. Ibaji kecha süngmangtsü mali,” ta Obama-i San Francisco Warfield Theater nung o jembidang ashi.
West-i, “Tesüiba mapang kar nung Obama-i politics tsütsü sensak asemtsü asoshi otelephone ajanga ni par kidangi jaok,” ta ashi, Ajisüaka Obama-i taoba mapang iba olulu nungi pila liogo aser pai, “Kü ket nung par ki telephone number mali,” ta Jimmy Kimmel dang ashi.
2010 nung Kanye-i adokba kensep nung ajemdaker Obama-i, “Nü tebilemba aser pongmangji kanga topur junga ammang aser temakitep lir,” ta tarütsü mapang Tir asütsüsang West dang ashi.
Tatemsa Obama-isa, “Naia sentsü tanak aser tenünga temenünütsüka balaka ja alir, Chicago anülolentip tsütsü alir ka linük nung aliba nüburtemi US Tir shimtsü ta amanger asü(?)” ta asaya menüa ashi.