Obama-i Kenya Tir, Uhuru Kenyatta den ajurutepogo

US Tir, Barack Obama aser Kenya Tir, Uhuru Kenyatta (Abelen) nati senden ka amentsü asoshi Nairobi kübok State House tonga aoba noksa nung angur. (Nairobi, July 25)

Nairobi, July 25 (Agencies): Tang Kenya semdanga alisang, US Tir, Barack Obama-i Kenya Tir, Uhuru Kenyatta den Nairobi yimitiba kübok State House nung tanü Honibar nü ajurutepogo.
US aser Kenya sorkar nati külemi lungjemer kiralongrartem, talisa, al-Shabab telok anema rarabaren nung taoba mapang amalitepa inyakba ama, tarutsü mapang nunga maneni amalitepa inyakteptsü tajungshiba olen ka Obama-i tanü lemsatepa liasü.
Somalia nung tongpang kanga sashia raraba nungi pei taküm kümzüktsü nükjidong nung Somalia toktsüba refugee-tem par Kenya linük jenokdakja lidaktsütsü melaba atema tepelaba olen ka Obama-i metetdaktsü.
Paisa ashiba agi, “Kenya nung osangbenertemi temulungtetba tajung yur pei mapa bendanga agüja inyakba ajanga Kenya linük tali tashi itshir.”
“Kenya nung terenlok alitsüren nem tetsükdaktsü bener arutsütsü asoshi inyakba maparen ajunga nokdangtsü asoshi ozü US-i nungdakba maparen bendanga agüja inyaktsü nangzüker. Ano, Kenya linük ajunga nung ochimashi inyakba agientsü asoshi nungdakba maparen inyakba ngua temulung kanga asür,” ta Obama-i tanü ashi.
“US ajunga nung shiditepo yokshibaren nokdangtsü ozüng tasen latetshitsü renema lir,” ta shia, Kenya nung shiditepo agizüka yokshitsü asoshi ozüng alema inyakertemi shidi tepsetba den sentakba onüka Obama-i Kenyatta den tanü benoka jembi.
“US aser Kenya nati tongti mapatong aika nung arok alizüng yua lir,” ta Kenyatta-ia Obama den lemsatepa liasü.
Par linüki kiralongrabaren den sentakba timtem ajuruba ajanga par linük nung democracy yimsüsütsü yimya benshitsü kanga saka akümtsü tenzükba olen ka pai tanü metetdaktsü.
Obama-i Kenyatta den ajurutepba jakdang Kenya nung tongti shishilembartem dena ajurutepa senden ka amenba osanga jangjaogo.
Africa nung alir shishilembartemi alima sabang nung tongti shilem agitsüsa par shishilembabaren inyaktsü tajungshiba olen ka Obama-i tanü Nairobi nung ayongba Global Entrepreneurship Summit senden nung metetdakja liasü.