Obama-i miim osangtem temai adokdaktsü:Trump

Washington, February 28 (Agencies) : U.S Tir Donald Trump-i, taoba mapang linük Tir Barack Obama-i yimsü asüba mapang miim osangtem temai adoka proshiba ajanga tan ita town hall nung Republicans tem jashidaktsü, ta ashi.
Iba ama longkak aitba ya taoba mapang Tir Obama ajanga asü ta asüngdangdang Trump-i, “Iba mapa ya pa ajanga lir. Ibai pai politics asayarba lir,” ta langzüa liasü.
Trump-i iba sülen taoba mapangtem nung miim osangtem temai adoka prokba ajanga pa Tir kümer külen office nung tebilemtsü adokba indang rasaa ashi.
“Telunglen kechisa atalokerar nenoki tejangja memeteter. Nai bilembaji shitak asütsü mesüra tai asütsü akok aser ibaji nai kodanga jangja memetettsü,” ta Trump-i osangbenertem dang interview ka nung ashi. Pai iba jembiba video tatsüka Hombar aonung TV nunga sayuogo.
“Ni kechiba taoba Tir Obama iba mapa nung dena lir ta ashir süra pa sülen anidakertemi ibai inyaker. Miim osang karbo pa sülen anidakertemi prokshiba lir aser ibaji linük security asoshi lendong lir. Ajisüaka ni iba ya politics ta angateta lir aser iba ama nungshitepba ya kodanga manentsü,” ta Trump-i ashi.
Trump-i pai jembibatem asoshi kuli kecha magütsü.
Trump’er administration nungi miim osang osangbenertem dang prokshiba agi kanga tipmatemer aser pa office-i aitba sülen nungi pai item osang shibai prokshirar itemji aser osangbenertem kanga aitsür.
Iba ama miim osang prokshiba ajanga linük security tashi mait kümdaktsür, ta pai ashi.