Obama-i MTCR aser NSG pusema nungitba atema pelar : PM Modi

Oval Office nung Prime Minister, Narendra Modi-i aser US President, Barack Obama na sensaksemdang agiba noksa angur.

Washington, June 7 (Agencies) : Mongulbarnü Prime Minister, Narendra Modi-i White House nung US President, Barack Obama den ajurutepa senden ka amen. 2014 küm India Prime Minister akümba sülen Modi-i tan agi tanabenbuba Obama den iba jenjang nung senden menogo.
Senden amenba sülen osangbener den sensaksemdang, India-i MTCR missile control aser Nuclear Suppliers Group (NSG) nung züngsem akümtsü atema merangba mapa nung pusema nungittsü nangzükba atema Modi-i Obama dang pelaba metetdaktsü.
Obama-i US nung Tir inyaktsü kümsük tembangtsü atema ita ishika dang anünga lir saka Modi tena ano khen ajurutepa senden amentsü sentong lir aser ibaji G20 summit mapang asütsü.
“Kü medemer tajung President Obama dang kanga pelar. Künati onük aika olemtepogo. US Congress-i ni jaokba atemaa parnok dang kanga pelar” ta Modi-isa osangbener senden nung ashi.
“Onoki katika yaritepa mapa inyaker aser iba asoshi nümatanga bilemer aser maneni külemi inyaktsü. India ya lanur linük ka lir aser ozü linük nung arishi küm 35 den teküpokpur nisung million 800 lir den tema lir. Ozü lanur tashi-i US den sentaktepba ajanga meimchir tenzüktettsü” ta paisa shisem.
Obama-ia, “Künati nuclear civil cooperation indang terenlok lemsatep aser ano regional security onüktem benoka jembi. India aser US nati cyber security atema külemi inyaknür” ta ashi.
Tanü Modi aser Obama na Oval Office nung ghonda ka shi senden amen aser iba mapang US Vice President, Joe Biden dena liasü.