Obama-i Nieto den taruba hopta ajuruteptsü

District of Columbia, July 15 (Agencies): US Tir, Barack Obama-i Mexico Tir, Enrique Pena Nieto den White House nung taruba hopta ajurutepa senden amentsü renemba osang ka White House-i tanü, Hokolbar nü metetdaktsüogo.
Canada Ato Kilonser, Justin Trudeau densema taoba June ita amenba ‘Three Amigos’ senden nung agiba telemtetbatem asangsang nung atalokdaktsütsü tasa aser lenmangtem bushitsü nükjidong nung Obama aser Nieto nati tan July ita 22 nü ajuruteptsü sentong renemogo.
1994 küm nungi tenzüka Canada, Mexico aser US-i agiba North America Free Trade Agreement toktsütsü amokmerenba olen ka US Tir menden asoshi Republican yimtenren telok nungi toktepsang, Donald Turmp-i sangoktsüba mapang ka nung US aser Mexico lenir anati tan ajurutepa senden amentsü sentong renemer lir.