Obama-i Saudi Arabia anema ken o benoktsü temeten nokdanger

Obama-i Saudi Arabia anema ken o benoktsü temeten nokdanger

Kiralongrartemi nübur anir senzüba tayimtsü tashiyim agi anir US kübok New York yimti nung 2001 küm September ita 11 nü lendong atalokdaktsüba sülen World Trade Centre nungi mokozü kanga sashia adokba noksa ka yangi angur. (File Photo)

White House, September 24 (Agencies): US nung ozüng küma benshitsü asoshi benokba Justice Against Sponsors of Terrorism Act (JASTA) onük nokdanga, kasaji ozüng küma mebenshidaktsütsü lemtetba osang ka US Tir, Barack Obama-i yashi, Hokolbar nü metetdaktsüogo.
JASTA ozüng küma agizükba ajanga kiralongrartemi küm 15 tejaklen US nung atalokdaktsüba 9/11 lendong nung asür aser yirur aser parnok kinüngertem nem Saudi Arabia linük anema ken o benoktsü temeten agütsütsü renema lir.
Nüburtem anir senzüba tayimtsü tashiyim agi anir kasaji amshia, kiralongrartemi US kübok New York, Pennsylvania aser Washington yimtitem nung 2001 küm September ita 11 nü lendong kanga sashia atalokdaktsü.
Iba lendong atalokdaktsür timbaka Saudi sensotem aliba osang tesülen bushitet aser iba yongji, 9/11 lendong ajurur aser kinüngertem nem Saudi nungi temenok sen akhangtsü temeten agütsütsü asoshi tan JASTA onükji ozüng küma benshitsü asoshi yimtenren sabang nung benoktsü tenzüka lir.
“JASTA ozüng küma benshiba agi tarutsü anogotem nung America sensotem taküm mekümzüktettsü aser iba ozüng benokba ajanga aseni tarutsü anogotem kiralongrar den sentakba lendongtema menokdangtettsü,” ta shia, Obama-i JASTA onük ozüng kümdaktsütsü maparen nokdangtsü lemtetba osang sangoktsü.
Obama-i tan JASTA ozüng mekümdaktsütsü asoshi inyak aka, par Congress-i iba telemtetba ajembanga kasaji ozüng kümdaktsütsü tashi lir.
Congress-i JASTA ozüng kümdaktsütsü lemtetra, ibaji Obama-i kümsük 2 tashi US Tir menden abendang pai nokdangtsü merangba onük ajembanga Congress-i tan mezüngsüa ozüng tasen latettsür asütsü.
“US-i JASTA ozüng latetra, ibaji alima linüktem nem agütsüba ozüng alema inyakbaren nungi kümzüka alitsü temeten anema inyaker alitsü,” ta US yimsüsürtemi JASTA ozüng latettsü onük benokba osang angazükba sülen Saudi sorkaria mepelaba olen ka metetdakja lir.
“Asen yimsüsürtemi JASTA ozüng kümdaktsüba ajanga bendanglen tenzüka alir asen ketdangsertemi timtem jenti ajurutsü,” ta White House-ia metetdaktsüogo.
Tir Obama pusema, JASTA ozüng mekümdaktsütsü asoshi US Senator aser Congress yimsüsürtem ajungshitsü nükjidong nung White House ketdangsertemia Washington kübok Capitol Hill nung senden amenba osang ka White House deputy press secretary, Josh Earnest-ia lemsatepa liasü.

You must be logged in to post a comment Login