Obama-i Saudi chuba, King Salman den ajuruteper

 

New York, September 04 (Agencies): US Tir, Barack Obama-i par linük semdangsang, Saudi Arabia chuba, King Salman den tanü Washington kübok White House nung ajurutepba osang jangjaogo.

Arishi küm 79 tain King Salman-i yimsüsütsü menden taküm January ita benokba sülen tan mezüngsüa US semdanger lir.

Alima tashi abenba linüktemi Iran den nuclear tezüngzüktep agitsü asoshi jembitepba den sentakba onük benoka jembitsü asoshi taküm May ita Washington kübok Camp David nung ayongba senden nung Salman-i shilem magitettsüsa aküm.

Aji oda, Salman-i tan Washington semdangdang, US densema alima tashi abenba linüktemi Iran den nuclear tezüngzüktep agiba ajanga Middle East nem timtem bener marutsütsü aser par linük ana tsüngda tesendaktep tali tajungba küma nungdakba maparen amalitepa inyaktsü den sentakba onüktem benoka jembiba osang jangjaogo.

Iran-i par nuclear sentongtem anentsü melena par linük anema benokba tenokdangba sentongtem agientsü asoshi alima tashi abenba linüktem aser Iran na tsüngda nuclear tezüngzüktep tawa agia lir.

Ajisüaka, Iran anema benokba rongsenren tenokdangbatem agienba ajanga Iran indang rongsenren jenjang kanga junga akümtsü aser iba jagi tanüngba Arab linüktem nem timtem agütsütsü ta Saudi densema Middle East nung tentetba linüktemi tebilemtsü khuret benoka lir.

“Iran-i Middle East nem timtem bener arutsütsüsa maparen meinyakdaktsüi nokdangtsü aser Saudi sorkar den kechisarena ajunga nung amaliteptsü renema aliba olen ka ozü lenisang, Obama-ia tanü Salman den lemsatepogo,” ta Obama’er deputy national security advisor, Ben Rhodes-i tesülen metetdaktsü.