Obama-i tepuokdak alir nisungtem indang temerenshi ajemtsür

Washington, October 28 (Agencies): US Tir, Barack Obama-i ozüng alema mozü mora achiba aser shibelenba ken o nung aitsüba sülen tepuokdak puoka alir nisung 98 indang temerenshi ajemtsüba osang ka White House-i metetdaktsüogo.
Obama-i Tir menden toktsütsü ita 3 shi anünga alidang tan tepuokdak puoka alir nisungtem indang temerenshiji ajemtsür lir.
Taküm tepiyong tepuokdak puoka ayutsü temerenshi ngua alir nisung 42 densema, Obama-i taküm küm tenzüker tanü tashi nung tepuokdak puoka alir nisung 688 indang temerenshi tajemba kümtsüba osang bushitetogo.
Obama-i 2009 küm January ita nungi tenzüka US Tir menden benokba sülen tanü tashi nung tepuokdak puoka alir nisung 872 tashi indang temerenshi tajemba kümtsüogo.
Obama-i temerenshi ajemtsür ajungaji nisung tepsetba ken o nung aija malirtem dang aliba osanga jangjaogo.
Nisung tepsetba amala ozüng alema kanga sashia aibelena malirtem nem tepuokdak puoka ayutsü mapang tatsüba agüja merenshitsü temelenshi agitsü asoshi Obama-i onük benoka aru saka iba onükji ozüng küma magizüki lir.
Obama-i sangküm, 2017 küm January ita 20 nü Tir menden toktsüba jakdang maneni tan amala tepuokdak puoka alirtem indang temerenshi ajemtsütsü sentong aliba osang ka White House-isa metetdaktsüogo.