Obama-i Tir Sein den election ochishia agiba tepela osang lemsateper

Yangon, November 12 (Agencies): Myanmar nung tetsükdakba kecha meli election ochishia agiba atema pelaba olen ka US Tir, Barack Obama-i Myanmar Tir, Thein Sein den telephone ajanga tanü Brehostibar nü lemsatepogo.

Myanmar-i tan agiba parliamentary election nung Myanmar opposition, Aung San Suu Kyi aser lai aniba National League for Democracy (NLD) yimtenren teloki tanü tashi nung otsüsütsüsa parliament menden noklang shilem nung shilem 80 shi anguba osang jangjaogo.

Aji oda, mitkartem ket nungi linük yimsüsütsü tashi benoka, Tir Sein-i küm 4 tejaklen nungi tenzüka par Myanmar nung democracy yimsüsütsü yimya benoka nungdakba temelenshi agitsü tenzükba sülen Suu Kyi-i tan mezüngsüa sorkar tasenba tentettsüsa tang jenjang angutsü tenzüka lir.

“US Tir, Obama-i ozü lenir, Sein aser pai aniba Myanmar yimsüsürtem ajunga den tan election sentong ochishia aser otsüsütsüsa agiba atem pelaba olen ka metetdaktsüogo,” ta Myanmar Tir, Sein’er otongdar & Information Minister, Ye Htut-i tanü osang jangjashitsü.

US-i Myanmar sorkar den maneni amalitep lia, nungdakba teyari agütsü aoshi taoba küm 3 tsüngda nung Myanmar linük anaben tashi semdangsang, Obama-i nangzükba osanga jangjaogo.

Ano külen, tan election nung Suu Kyi aser lar NLD teloki takok anguba osang agizükba olen ka Myanmar mitkar lenisang, Min Aung Hlaing-ia metetdaktsüba osang ka Tir Sein-i metetdaktsü.

Election nung takok anguba osang pela agizükba den külemi, Suu Kyi-i tawa ayongba ama, sentaktepshitsü senden nunga shilem agitsü asoshi Sein aser Hlaing napronglai renemba osanga metetdaktsüogo.