Obama-i UN telemtetba nokdangtsüla: Trump & Netanyahu

Jerusalem, December 22 (Agencies): United Nations (UN)-i Israel’er kiojen renemtsü maparen anentsütsü atema agitsü renemba telemtetba nokdangtsü tajungshiba olen ka Taruba United States (US) Tir akümtsü temeten ngua alisang, Donald Trump aser Israel Ato Kilonser, Benjamin Netanyahu nati tanü, Brehostibar nü sangoktsüogo.
Israel linüki Palestine nungi tashiyim agi agia aliba lushi nung par nüburtem alitsü kiojen renemtsü tenzükba maparen tekaratiba nung anentsütsü telemtetba ka UN-i agitsü renema lir saka iba telemtetbaji asangsang nung magitettsüsa nokdangtsü atema tan lenir anati Obama aser pai aniba US sorkar ajungshir lir.
Netanyahu aser Trump nati tan tajungshiba olenji par Twitter aser Facebook ajanga mapang balala nung lemsatepa liasü.
“US sorkari taoba mapang sangdongba ama, yimjung senden amenba ajanga dang Israel aser Palestine na tsüngda teti atema yimji yimjung litettsü. Ajisüaka, tan Israel’er kiojen renemba maparen anentsüba ajanga par linük ana tsüngda yimjung tezüngzüktep takok ngua magidaktsütettsü,” ta Trump-i ashi.
“Tan Israel linüki tenzükba mapatong anentsüba ajanga par linüki Palestine den yimjung senden amentsü nung par linük jenjang mejungi kümdaktsütsü aser ibaji tim masüba maparen ka alitsü. Ajungji, UN-i lemtettsü renemba telemtetba asangsang nung magitettsüsa Obama aser pai aniba US sorkari nungdakba maparen inyaktsü ajungshir,” ta Trump-i nenshia ashi.
Egypt-i tan Bodbar nikongtsütsü benokba sülen alima linük 15 züngsemba UN Security Council (UNSC)-i Israel’er kiojen renemtsü maparen anentsütsü telemtetba agitsü renema lir.
Obama aser pai aniba US sorkari Israel-i West Bank aser East Jerusalem na nung par kiojen renemtsü maparen inyakba anema aruba osang bushiteta lir saka Obama-i Tir menden taruba January ita toktsüba jakdang Israeli-Palestinian yimjung maparen nung tongti shilem magitsü lemtetba osang angazükogo.