Obama o Clinton na IS tenteter kaka lir: Donald Trump

Washington, August 11 (Agencies): US Tir, Barack Obama aser Democratic yimtenren telok nungi US Tir menden asoshi toktepba candidate, Hillary Clinton na Islamic State (IS) kiralongrar telok tenteter kaka ta shia, Republican telok nungi Tir candidate, Donald Trump-i Obama aser Clinton na aitsüba olen ka tanü, Brehostibar nü sangoktsüogo.
“US-i par mitkartem Iraq nungi anitetadokba ajanga Iraq aser kidangsü aliba Syria na nung IS teloki amenoktsü maongka tulu angu,” ta shia, Trump-i Obama aser 2009-13 tashi US Secretary of State menden abenla, Clinton na aitsü.
Trump-i Obama o Clinton na aitsüba olenji US kübok Florida nung agiba election nüboyimtsü sentong nung tan Bodbar nü mezüng sangoktsü aser pai tanep CNBC osangbener den ajurutepdang Trump-i kasa olenji metetdaktsü.
Trump-i par yimtenren telok lenirtem den mangatettep adoka taoba hopta süidaktsüba sülen pai tan iba aitsüba olenji sangoktsür lir.
Taküm, 2016 küm November ita 8 nü agitsü ayongba US Tir election atema toktepbaren nung Trump-i Clinton den tekübokba jenjang angutsü tenzükba osang ka nüburtem rong nungi osangtsüsang agiba sülen bushiteta lir.
RealClearPolitics teloki osangtsüsang agiba sülen tanü tashi nung Clinton pusemer nübur noklang nung shilem 48 lia, nübur shilem 40.3 agi pusemtsü mulunga alisang, Trump den shilem 7.7 agi temaba jenjang anguba osang tawa bushitetogo.
“IS telok tentettsüren nung Obama aser Clinton nati tongti shilem agi aser iba yongji tena ya IS telok tenteter kaka lir ta sangdonger,” ta Trump-i nenshia ashi.
Tir Obama-i ozüng agütsüba sülen par mitkartem Iraq nungi 2011 küm aniteta liasü.
Trump-i tan o tulu jembiba ajanga tarutsü anogotem nung pa anemer aika küma par election jenjang tamajungba akümtsüa anena nung dang lir.