Obama o EU lenirtemi NATO ajanga amaliteptsü nangzükteper

Germany yimtiba, Berlin nung (Abelen nungi tarensena) Britain Ato Kilonser, Theresa May; Spain Ato Kilonser, Mariano Rajoy; Italy Ato Kilonser, Matteo Renzi; US Tir, Barack Obama aser France Tir, Francois Hollande nungeri Germany Chancellor, Angela Merkel den teloktep senden amendang agiba noksa ka yangi angur. (Berlin, November 18)

Berlin, November 18 (Agencies): US Tir, Barack Obama aser European Union (EU) lenirtemi North Atlantic Treaty Organization (NATO) ajanga amaliteptsü tezüngzüktep ka Germany yimtiba, Berlin nung tanü, Hokolbar nü agiogo.
Alima ajunga nung tensa tajungba kümdaktsütsü aser tetsükdaktsü kecha meli nungdakba terenlok lidaktsütsü nükjidong nung Obama aser EU lenirtemi tan tenzüngzüktepji agi.
Tawa agiba US Tir election nung Republican yimtenren telok nungi candidate, Donald Trump-i takok ngua, US Tir tasenba akümtsü temeten anguba sülen alima ajungai terata tia ka ajurua, tebilemtsü khuret akatsü tenzükba mapang ka nung Obama aser EU lenirtemi NATO amala alima jenjang nung tentetba tongti tentettem ajanga maneni amalitepa alitsü nangzükteper lir.
“Russia linüki NATO nung züngsemba linük ka anema amaktsü maparen inyakra, iba linüki nungdakba linük kümzüktsü tenangzükbaren mapa küma inyak asü meinyak iba osang jangjaba sülen ang par linük nem nungdakba mitkar teyari agütsütsü,” ta Trump-i election agiba jakdang par nüboyimtsü sentong nung metetdakja lir.
“Alima tashi abenba lenirtemi Atlantic tzüyim ajangdanga amaliteptsü aser Middle East o North Africa na nung tensa azüoktsü mapatong nung maneni amalitepa inyakteptsü nangzüktepogo. Ano, tang Syria aser Ukraine nati ajurushia aliba mangatettep ken o-a yimjung sentong ajanga benetettsütsü atema nungdakba maparen inyaktsü nangzüktepa liasü,” ta White House-i osang jangjashitsü.