Obama o Xi na taruba hopta ajuruteptsü: Baodong

Beijing, March 24 (Agencies): China Tir, Xi Jinping aser US Tir, Barack Obama nati US kübok Washington nung taruba hopta ajuruteptsü sentong renemogo.

Washington nung amentsü ayongba 4 buba Nuclear Security Summit tezülen ajurutepa, Obama o Xi nati tang mangatettep adoka aliba South China Sea den sentakba jurila senden ka amentsü asoshi sentong renemer lir.

“Tir Obama aser Xi nati taruba hopta ajuruteptsü sentong renemba ya tenati taküm tenzüker tanü tashi nung tang mezüngsüa tsüngdong ajuruteptsü sentong renemer lir,” ta China vice foreign minister, Li Baodong-i osang jangjashitsü.

US-i par mitkar rong aser tayimtsütem South China Sea-i yoka China-i South China Sea par meyong ta züngshibaren magizüker ta alima dang sayua lir aser par linük ana lenisang anati tan tsüngdong ajurutepba ajanga iba mangatettep ken o nung tangatettep kati arutsü akok.

Tan March ita 31 nü nungi taruba April ita 1 nü tashi Washington nung amentsü ayongba 4 buba Nuclear Security Summit nung shilem agitsü asoshi Obama-i Xi jaoka liasü.

“Nuclear senden nung shilem agiba jakdang Xi-i Czech Republic linüka tan March ita 28 nü nungi 30 nü tashi semdanga Czech Tir, Milos Zeman den ajuruteptsü sentong renema lir,” ta Baodong-isa metetdaktsüogo.