Obamacare atema Trump-i executive order agütsü

Washington, October 13 (Agencies): Barack Obama meyongnem inoka aliba health care reform anema US Tir Donald Trump-i tanü pa indang executive tashi amshiogo, koba ajanga teyari tajemba agütsütsü, ta nisung aikati ashir.
Obama US Tir inyakba mapang yangluba Affordable Care Act koba dang Obamacare, ta ajar, iba sentong ajanga US nung teintet nisungtemi mozü agiba nung US sorkar ajanga teyari agütsüsemer, iba ya Trump tir menden nung amenba sülen agientsü asoshi Congress nung aiben merang, saka tamakok alua aru. Saka tanü Trump-i iba executive order agütsüba ajanga iba sentong nung temelenshi alitsü.
Iba temelenshi ajanga teyari agütsür rongnung tetoktepba tali adoktsü aser lenmang tali lapoktsütsü aser iba ajanga nisung million aika dak kongshitsü, ta Trump-i ashi.
“Iba ajanga United States sorkar sen meindoktsü aser nüburtem asoshi health care tajunga akümtsü. Aser nüburtem, ta ni ashiba ya million ser million indang jembir,” ta pai ashi.
“Iba inyakyim ya tamajungba akümnungbo tenüng tamajung ji tir dangi arutsü,” ta Democrat Minority telok nungi lenir Chuck Schumer-i ashi.
Obamacare ajanga America nunger million aika nem teyari agitsür saka iba ajanga shishilembaba nung sorkar tiyongi aiba sayur, ta Republican teloki nokdakter.