Obamai shimba India nunger US Surgeon General ka Trump-i anendaktsü

Washington, April 22 (Agencies) : US nung temang anema aliyim mapa nung lenir tasen anioktsü mechi nung Obama mapang shima yutsüba, India nunger US senso mezüngbuba Surgeon General, Vivek Murthy Trump-i aniba sorkari anendaktsüogo.
Par tsüraburtem ya shitakbabo India kübok Karnataka state nungi lir aser Murthy ya Huddersfield, England nung asoba sülen pa arishi küm 3 asüba mapang Miami, Florida-i aru.
Arishi küm 39 tain, Murthy ya pa kübok inyaker deputy, Rear Admiral Sylvia Trent-Adams-i melen. Sylvia Trent-Adams ya nurse tem rongnungi linük nung Surgeon General akümer mezüngbuba asütsü.
“Trump Tir mendeni atuba sülen US Public Health Service Commissioned Corps nung lenir Murthy dang pa mapa, Surgeon General nungi anentsü asoshi osang agütsü,” ta Hokolbarnü US Department of Health & Human Services sangdong ka ajanga metetdaktsü.
“Murthy-i Surgeon General mapa toktsüogo aser pa Commissioned Corps nungji joko züngsem ka amai inyaktsü, ta sangdong nungji shia lir.
Murthy nem US Surgeon General mapa ya December 2014 nü benloktsü.
Pa iba mapa nungi kechiba anentsüar ano osang tejangja memetet. Murthy kechiba iba mapa nungi aoksaa anendaktsü ta Department of Health & Human Services nung inyakertem miima kanga süngmangteper, ta osangkaket nung shia lir.
US nung Surgeon Genaral 19buba aser India nunger US nung mezüngbuba Surgeon General, Murthy-i, iba akhümket mapa nung inyakshibaji ni asoshi maongka tajung ka aser nema tangtetba mapa ka liasü, ta Facebook post ka nung shia lir.
“India nungi ni ama sensaker aluyimer ka semchir dang US Tir-i linük rangben indang ‘health’ mapa reprangtsü asoshi mapa nungloktsübaji America nung otsü khenyongi balaka asütsü. Küm 40 tejakdang ozü kibong rangben linük nung arua alitsü pelashishia agizükba aser kü nem America nung iba akhümket mapa agütsüba asoshi US dang ni kanga pelar. Ni ano tarutsü mapangtem nunga linük nung mapa tasen ajanga tenzüktsü,” ta pai ashi.
“Murthy-i pa mapa kanga bendang agüja inyakba asoshi (Health and Human Services) Secretary (Tom) Price-i tenüngsang agütsü,” ta sangdong ajanga ashi.
Murthy dena India nunger ana tashi Trump-i mapa tulu nungi anendaktsüogo.
Trump-i iba jakdang New York nung US Attorney inyaka alisang Preet Bharara-a mapa nungi anentsü.
Murthy ya tang Boston nung aliba Brigham & Women’s Hospital nung physician aser Harvard Medical School nunga Hospitalist Attending Physician & Instructor mapatem teinyakdak lir.