February 20, 2016 nü OBASSI (Nagaland Chapter)-i Longwa yimdak angati health camp ka agidang tangokba noksa angur.
Dimapur, February 20 (TYO) : February 20, 2016 nü Old Boys Association of Sainik School Imphal (Nagaland Chapter)-i Longwa yimdak “Camp Wellness” ta ser angati health check-up sentong agi.
Mon nung Indo-Myanmar arrtsü anasa aliba Longwa yimdak Sainik School Imphal (Nagaland Chapter) nung Tir, Dr. Mhonbemo Ovung aser Tongti tezülur, Lima Imsong nati anir Ex-Sainik kaketshir parnok 25-i iba sentong nung shilem agia liasü.
Sentong tatsüka agidang Superintendent of Police, Mon aser Sainik School Imphal alumni, Cadet Yangba Konyak-i Old Boys Association dang health camp cum plantation drive ayongzükba atema pelaba metetdaktsü.
Myanmar den arrtsüa aliba tesemtem nung alir asoshi iba sentong tajung ayongzükba ajanga nübortem kanga ajangzüktsü aser iba ya tetenzüker sür arrtsülen makamaiter aser tangar memenepertem yaritsü asoshi maneni mapa tajung inyaktsü ayongzüker, ta Yangba Konyak-isa ashi.
Longwa nung Longkhong Village Council Chairman-ia tayongertem District Administration, Phomching PHC o District Hospital, Mon nungi Medical Officers aser staff ajak dang pelaba metetdaktsü.
Iba sentong nung nisung 1200 shi angati temang tendanga reprang aser mozütem lema agütsü. Old Boys Association-isa tenlaki aser football ground, Longwa temeket nung süngdong kar tema yutsü.
Iba mapaji Deputy Director, Soil & Water Conservation Department Cadet Khekiho Shohe lenisüba kübok inyak.
Dr. Kechangol Sophie, Dr. Lhouvizetou Belho, Dr. Mhabemo Ovung, Dr. Hokugha, Dr. Philip, Dr. Imliwapang, Dr. Temsulong nungertem den Mon District Hospital o Phomching PHC nungi doctor temi yaritep.
You must be logged in to post a comment Login