Obendang mangaba yimten

Kerala nung akhidang yangluba küm 800 shi tain Hindu nunger tekülem ki ka tenüng agi Sabarimala temple lir. Iba tekülem kidang tetsür ita shilem aoer rogo arishi küm 10 nungi 50 tashi telongi meidaktsür, kechiyong parnok jagi iba tenla kiji menentsür ta Hindu nungertemi amanga aru. Ajisüaka, tawa Supreme court-i iba sobaliba ozüngji agientsü aser tetsür tebur ajak tekülem kidang pei tsüngrem külemtsübaji kasasa temeten lir ta obendang agütsü. India ama nübortemi mulungba yimten kümteta yimsüsüba lima ka nung tajung kaji, yimsüsürtemi mulungba nung dang yimsü asür masü saka parnok madak okadak obendangertem lir aser ano parnok kübok inyaktsü asoshi government nung ketdangsertem lir. Ano, parnok den parnoki inyakbatem metetdaktsütsü aser mita anidaktsü asoshi osangbenertem lir. Iba jagi yimten mapa nung kati ka akümtsübutepa inyaker. Aji oda, yimsüsürtemi tatar senden nung telemtetba agiyonga, ibaji anema nübortemi okadak benokra, obendangertemi angadanger obendang agütsür aser iba obendangji kechisüdir süaka yimsüsürtemi angatsüsa akümer. Iba amaji kati aibelenba kati metongshitepa inyaktsü asoshi yimten inyakyim kanga junga metongteta lateta lir. Ajisüaka, tang supreme court-i tetsürtem nem Sabarimala temple nung külemtsü asoshi tementen agütsüba sülen iba obendang maginertemi akhi ama tetsür arishi küm 10 nungi 50 tashi shinga tekülemi marudaktsütsü ta nokdangba ajanga tetsürtemang masü teburtema dena iba tekülem kidang mekülemtettsüsa timtem adoker shibanga lir. Atangji, supreme court-i obendang agütsüba mapa küma meinyaktetbaji linük asoshi kanga lendong mapang ka tenzükdagi ta shisabolua bilemer. Iba denji ano tawa BJP tir Amit Shah-i Kerala nung oagi supreme court-i obendang agütsüba aija jembibaji linük asoshi kanga lendong mapa ka asütsü. Center government ya BJP teloki anir, anungji BJP tir dak government tashi lir. Iba ama tashiji bener supreme court aitsübaji India asoshibo alima tatembang kati aru amai asütsü. Ibaji dang masü saka Amit Shah-i Kerala nungertem dang Kerala government-i supreme court-i agütsüba obendangji mapa küma inyakra majungtsü ta amokmerenbaji linük nung yimsü tesüdak telok nung tir kati jembitsüba o bo masü. Paisa obendangertem dang mapa küma meinyaktettsüba obendangbo magütsütsüla ta metetdaktsüba jagi supreme court-i obendang agütsübaji jenjang mali kümdaktsür. Atangji, supreme court-i agütsüba obendangji mapa küma inyaktsü tasak asütsüa akok, ajisüaka obendangdak obendangertemi parnoki agütsüba obendangji mapa küma inyaktettsü asü masü ta asüba nung masü saka kechi shitak aser koba tai asütsü ta bushir külen obendang agütsür. Obendangdak nungi obendang agütsüba mapa inyaktsübajibo government lir, anungji government nung alirtemi obendangdak nungi agütsüba obendang aija jembira, kodanga mapa küma meinyaktettsü. Ano, tang linük nung BJP teloki anir jembibaji Ayodha nung Ram tenla ki yanglutsü atema obendangdak nungi obendang magütsüyonga tatar hoho nung telemtetba (ordinance) ka aginür. Ajisüaka, iba ken o ya obendangdak benoka alinungji, tatar hoho nungbo mejembitettsü. Ashiko, joko parliamentary election tonga arur asünungji nübortem mulung akoktsü asoshi jembir alitsüa akok. Election liang teli, koba government-i yimsü südir süaka supreme court nungi obendang agütsübaji kechisüdirsüaka mapa küma inyaktsü merangtsüba dak alaka aitsütsübajibo tim masü. Koba lima nung südir süaka yimten teloktem melentepa yimsü asütsü, anungji pei mapang nung tesüiba government nung inyakba mapa tajungtema züngshia akümtsübutsüla. Ajisüaka, pei mapang nung tesüiba government-i inyakba aser yangluba mapa tajungtem dena nembangtsütsü aser raksatsütsü merangra tarutsü nung tangar yimsüsürtemia tang yimsüsürtem anema yamaji inyaktsü. Alima asünungji yimten melenteptsü, takok aser tamakok ajurutsü, ajisüaka obendangdak nungi obendang agütsübaji government-ibo kechisüdir süaka mapa küma inyaktsüla, ajimesüra government mali ama kümadoker nübortemi pei inyaknütsü inyaktsü. Tangbo asenok iba ama lendong ajurutsü aoer amai odagi !