Obendanger asemi akümba ludeni bushisüngdangtsü

Colombo,Metsüremi 10 (Agencies) : Central Sri Lanka nung Muslim nungertem anema tashiyim maparen inyakba ajanga ketdangsertemi linük ajunga nung emergency alitsü sangdong aser tang iba dak sendakba bushisüngdangtsü atema tanü Küptoknü Tir, Maithripala Sirisena-i luden ka shimtetogo.
Tir office ajanga sangdongba osang ka nung ashiba agi, Kandy nung ozüng raksaa tensa koma mejungi aküm, iba indangji bushisüngdangtsü atema obendanger (retired) asemi akümba luden ka shimtetogo.
Anogo pezü tsüngda atalokba tashiyim maparen nung nisung asem taküm sama aser tangar metsü shi yiruba den Muslim nunger indang business inyakba tesemtem aser ki noklang ana dak tema raksatsüogo aji oda süaka, Yangtepnü nungi tensa tajungba küma odagi ta angazüker.
Police-i ashiba agi, Muslim nunger tekülem ki terka raksatsü saka sepaitem talila aika yoksemba sülen tensa süngjema kümogo.
Colombo yimtiba nungi kilometer 115 pilar aliba Kandy district nung tanü Küptoknü nungi curfew ozüngjibo agienogo saka sepai o police na longjemer maneni tesem mita jajadagi, ta ketdangsertemi metetdaktsü.