Ochi ashibasa tajungba

Alima nung alirji, aiben kija taküm, kibong, lokti aser yimten nung tiyazü jembitsüsa akümer saka akok tashi tiyazü mejembii ochishia ali tajungba. Karibo ashir, tiyazü asüyonga aiben jembira shitak akümer, ajisüaka kodanga tiyazü ana agi shitak ka mekümtettsü. Tanü tamakok maginüdang, maksü majurunüdang aser takoksa mengunüdang asenok aikati tiyazüa ta meteta asenoki shitak amai jembir. Yimten nung balaka asenoki tiyazü jembia dang yimsü asütsü meranger, kechiyong tiyazü onsara nungji tiyazü mejembira yimsü mesütettsü amai asenoki bilemer. Aji oda, akhidang otsü oboula nunger mapang nungi yimten nung ochishia dang yimsüsüa aru ta jembia aruba to, tanübo obala nunger mapang nungi tiyazü jembia dang yimsüsüa aru ta asen chirnurtemibo jembitsüsa tiyazü nung amendakba putu tasen ka asenoki yangerteta lir. Yimten yimsüsür aser tantsü tambu ajaki anogo shia yimten aser lokti sabang nung jenbidang, lanurtem dang tangar asoshi tatishitsü tajung ka küma litettsüsa pei mapa nung meranga inyaktsü aser ochishia alitsü indang ajungshipet ajungshir. Ajisüaka, tajungshi o jembizükli tiyazü jembir aser ochimashi mapa inyaker. Joko, asen lima ya kari ochimashi mapa inyaker aser kari item ochimashi mapatemji tiyazü jembia shitak kümtsütsü meranger ta ochi ayudakbo tesem tilakata anünga meyutsüi tiyazü-tiyazü agi sünga lir. Takartemi mapa meinyaki sensakertem meyong shilem agizüka agir, tulurtemi tilartem tenüng nung tapu aika yanglua agir, tesayurtemi dena pei melen tangar yoker aser mapai moi ita sen agir. Itemji metongshitsütsü melen yimsüsürtemi dena kati tai inyakba kati küpbangtsütsü meranger.Yashiang asenoki asen lima nung ozüng yanglur yimsüsür kati vote enoktsüdak tangar tenüng nung dena vote aiben enoktsüba asenoki nguogo. Iba jagiang election-a tanaben agishiogo. Ajisüaka, ozüng raksaba aser aibenlenba dang nung jagi tuluba aibelen aser ajak asoshi tesasatsükaji iba taiji tai inyaksangiang masü saka par teloki dena menangzükbaji asütsü. Nagaland nung tangar melen vote enoktsüba mesüra kibong shia tenüng nung nisung kati dang ajak atema vote enoktsübaji tasen masü. Item taiji shitak kümer benshiba purtemji asenok lir. Asenoki masüa ta asüyonga, vote enoktsütsü aodang asenoki pei tenüng nung sign asüba mesüra temeyong anembatem to reprangshi nung melemelaa jungkai adokadoktsü. Kecha miimshitsü mali. Ajisüaka, ajaki ngua aibelenba aser tai menaba dena menangzük nungbo nübortemi mengui inyakba taitembo kechi komaka asütsü ? Asenok ya yamai ayongayonga pelatepa tiyazü nung joko ojang yimsü asütsüla aser talia malitsüla. Iba amai shingaia tebushir mali aser tapurtema mali, sademsadema tiyazü jembia ochimashi mapa tululu inyaktetba ya takok aser tepela angutsüba lenmang masü, ibai asenoksasa asenok pokseta asütsü bomb yanglur amai lir. Joko, tiyazüa jembishia jembiogo aser ochimashi mapatema inyakshia inyakogo, Asenoki memeteter aser tan masür dang ashi, asenoki jembiba tiyazü aser ochimashi inyakba mapatem agi asenok chirnurtem tagidak maka küma omadagi aser asen lima kanga raksaa lir. Asenoki tiyazü ka jembili, asen lima nung auer ana adokli, ochimashi mapa ka inyakli, rakzükratemer ana adokli ta asenok ajak auer aser rakzükratemer kümogo. Joko, tangbo mapa shitak inyakerbo shinga mali saka ajak tebokbo sünga chiyongtetter. Ajisüaka, tiyazü agi kopiga asenoka tebok sünga litettsü ? Asenoka kopiga ochimashi pu kümtepa tesünep nung litettsü ? Joko tai dangbo tai ta shiteta taidok nangzüktettsüba shisatsüji asenok ajak dak alitsüla. Tai nangzükba ya maksü mapa ka masü saka Tsüngremi mulungba mapa ka lir. Iba yabo Tsüngrem tsüburtemi dang inyaktetter. Tsüngrem tenüngbo kanga tetshir, saka tiyazü kanga jembir aser ochimashi mapatem pu küma nokdaker ta süra asenoki yamaji jembia talangka onüyonga moutettsü aser linüyonga melitettsü. Joko, Tsüngrem ojang mesüshidi aser nübortema ojang külakoktsüdi aser khen atemabo takoksa arema tiyazü jembiba anendi aser ochishia alibasa tajungba ta angatetdi.