Ochi jembiba atema Chidambaram anema apusor: Priyanka

New Delhi, Luroi/August 21 (Agencies): INX Media ken o nung Central Bureau of Investigation (CBI)-i Congress lenir aser taoba mapang Union Minister, P Chidambaram aputsü bushiba dak sendakba nung Congress general secretary, Priyanka Gandhi Vadra-i, Chidambaram-i ochi jembiba atema pa anema apusor, ta ashi.
Mongolbar aonung nungi tenzüka CBI-i bushiaka tang tashi Chidambaram kong aliar memeteter.
Priyanka-isa, “Pai (Chidambaram) marendaki ochi jembir aser iba sorkar tamakok jungkai adoktsür,” ta ashi.
Twitter ajanga Priyanka-i, “Kanga tettemsü aser akhümtsübua aliba Rajya Sabha züngsem, @PChidambaram-i Finance Minister aser Home Minister densema menden balala nung küm aika linük tenzüka aruogo. Pai marendaki ochi jembir aser iba sorkar tamakok jungkai adoktsür,” ta ashi.
“Ajisüaka ochi jembibaji tasümaitertemi tsübur, iba yongji taaktsü melii parnoki pa anema apusor. Onoki pa den nokdaktsü aser ochi atema maneni raratsü,” ta laisa ashi.
Congress Party nungi lenir, Digvijaya Singh-ia kasa onük nung CBI aija, iba ya yimtenren nung mangyangtsü atema inyaker, ta ashi.
Taoba mapang Madhya Pradesh Chief Minister, Singh-isa, sorkari maparen ajak nung mangyangtsü atema inyaker, ta ashi.
INX Media ken o indang FIR nung Chidambaram tenünga densema mali, ta shia Digvijaya Singh-i, “FIR nung Chidambaram tenünga densema mali, aser pa anema kuli maliba ken o ka nung CBI-i pa anema apusobaji ni sashia aitsür. Iba ya yimtenren nung mangyangtsü atema inyaker,” ta ashi.
Delhi High Court-i Chidambaram nem bail magütsüba sülen pai pa maputsü atema Supreme Court nung temepishiba ka agütsüogo. Tanep New Delhi nung CBI team ka par kidangi ao saka pa kidang maliasü.