Ochi nung akanga litetba kübo

– Mrs. R. Mapukala Pongentsür (Chuchuyimlang)
Merangmen, Tzürangkong

Metsü ozüi pa mapang shitak nung lepa shilang medem,
Tsüngmoka amoka tanü Obalatem anogo amongdang,
Nemjemseta, temulungjang nung tongtonglatsü atua,
Kübo akümli temeim longraseter ani…..
Ya ali nung shingaia paidoktsü mekok-ka.
Kechisarina mataloki süitema oaka, tasübajibo ajurulanglang.
Koba mapang atalokdir melenteptsü makok,
Nunga ta shiaka, ojalai asoba taküm shia-i iba anogo tenjitsüsa.

Au! Meimchir taküm shia taruba anogo ka lir
Yamaji akümli nungi meyiba aoba mapangjia ajurur.
Terongjen Lumonger ka anü alu den ilonga ki bushi ama
Aein lima anogo ishika monger meyipa aoba den saku
Takümtem ajak kanga kara-a asü lima jagi asemteper
Pongmang ka ama asemjen-asemer,
Rongjenseta senti atang lenmang nungji kenübo jajatsüsa
Süra shiba-ibo ni maruli ta shitetsüaka!

Tanü anogo ya kübo akümli temeim mapatem meyiba shisadanger,
temulung zürepa OBA! Nü mang ayimer.
Ochi jembitsü mekorosang, ochi nungbo tasü arema nokdak küboi,
Piyong tenem nung anü adoker ama, OBALA tesünep mulungjang,
Ajemalu, tila akümba shisatsüji nü sobutsü
Tsüngrem tsübuba ji nü meraket ta nai züngshi
Tajung dang inyaktsü mulungtetsang, Tanü na ama tebu kar tanga sotetlasang!
Par chirnur semchirsemnur-a Teyanglur Tsüngremi memoatsülima!

Oh OBA! Tanübo na meliani Tsüngdangpi konga azüng-ogo
Ki ka nung jara mali ama, kangasa sensena kümogo…….
Akümli nung OBALA mali yabo yamai no?
taküm lenmang nung jajatsü kanga tasak akümbok maliba lenmang mesük,
Ni asoshi tsüngi o sayur mali kümadokogo ni….
Nai Tsüngrem dang nünga sarasademtsüba olabo ronu-i arur,
Saka asangsang nung na mali, Oh OBA, asür lima nungi na arulasang
Kü dang nü sayubentsü o tem to shilasang, koda pelala.

Tanübo nür chirnurtem nai alangzüktsüba taochi senmang nung,
Mesenseni nokdaka lir, Oba na meliaka ozüi ya shijen ashitsü,
Tsüngrem mapa nung teti bendanga agütsütsü küboi sayu,
Masetshili, ya OBALA nungi angazükba miim mapa,
Kübo-i Teyanglur mulung chia litetyong,
Akümlir-ia tatishitsü süa tetemjen tebu-a ta ajatsü nü mapa agi langogo…
Na ali shi temang Lep nung shizüka oaka, nü tsüngsü onok rongnung kodanga mesamatsü.

OH OBA ! Nü akümli akümbok nung onok anisüngzüka lia aruogo,
Taoba anogotem menungra rongjenseta nüktzü aneter,
Akümli tatempang Obala Ola ka kü narongi arujen arur,
Tasü itang, akümli tongpang jenti lir, saka Tsüngrem tamadok
Tangula tatem tashi, kodaker ken tena tepela nüktzü tzüngranger,
Tebur tajung ayong külen jagi ni arung ta ajaba ola angashira ta shia amozüka aoba,
Tsüa! mepilemli ta süaka tali-ang bilemteter…
Saka OBA… Na shitak Kotak nung lir ta ni amang nung pelaseter.
KODAK NUNG AJURUDI…YISU TSÜNGDANG
AJI NÜ CHIRTEM TEIMLA….Salem-a ni OBA…