Ochi nung mapa inyakdakjang: NFHRCC

Dimapur, Aenjeti/January 06 (TYO): Yimjak nung sangdongba ama ‘jeep-able foothills road’ yanglutsü asoshi January 7, 2022 nü contractor shimtsü aliba nung dangalen nungi tashi kecha mamshidaktsütsü Department of PWD (R&B), Government of Nagaland dang ajungshir, ta Nagaland Foot Hill Road Coordination Committee (NFHRCC) ajanga sangdong ka nung ashi.

Department ajanga iba contract ya mapang tatsüka tsüngta mapa shidak inyaktettsüpur firm nem kanga junga shisadanger agütsütsüla aser 3rd party firm nem meinyakdaktsütsüsa ozüng yanglutsüla, ta ashi.

Maneni Tribal HOHO tem den külemi pei litsü nung mapa ochishia aser shidak inyaktsü atema Department, Contractor aser NFHRCC tsüngta jembiba ama inyaktsü atema sorkar dang ajungshir, ta ashi.

Committee ajangasa Bridge Contractor M/S L Pukhato Shohe & Sons dang apu tang teyangludak aliba ya kechi südir süaka 2022 küm February ita nung mapa shidak inyaka renemtsü ajungshir, ta sangdong ajangasa shia liasü.