Ochi o shitak na !

Ochi o shitak na ya kasa amato saka kenyongi balala ta tangatetba ka dangi aruogo. Iba tangatetba ya yakanü Dimapur nung osangbenertem ‘National Press Day’ amongba sentong nung Morung Express yimozülur, Dr.Akum Longcharii jembiba mapang agüja liasü. Asenoki aiben shitak amai bilemer inyakba mapa aika ochi masüba mapatem asür. Aji oda, mapabo tajung asütsüa akok anungji shitak amato saka ochibo masü ta asüba mapa aika lir. Ibayongji tanü asen lima azükaru masür südi. Asenoki Tsüngrem mapa inyaktsü asoshi tenla sen aika agütsür, aji shitak kechiyong asen keti aruba rongsen nungi Tsüngrem nem tenla agütsütsüla. Ajisüaka, iba senji kongi nungi aruba sen ? Ochishia aaba sen asü ochimashiba len nungi aruba sen (?) ta asüngdanga bushidangra, ashiko arogo dangi aruba tenla sen teimbaka ochimashiba len nungi aruba sen asütsü. Iba jagi shitak o ochi na bendanger. Ashiko, tenla kidang tenla sen sarur meshiteta sarasademba agi ochimashiba len nungi aruba sen meshitetter ta bilema alitsüa akok saka ochimashibalen nungi bener arua Tsüngrem nem tenla agütsübaji Tsüngrem mezüngmeshiba mapa ka lir, anungji tenla sen meshiteta sarasademba agi iba temenenji asenok dak nungi maotsü. Tetezü meshitettsü makoktsü. Aji oda, nisung aikati aluyimer, sensaker, timtemer, shiranger, tantsür tambur aser nükpoktsüpokertem yaritsü atema government-i lemzüktsüba sen miimzüka agir aser iba sen nung jagi tera agiteta timtemer yarir, benjong ania yimkong chiyongdaktsür aser lokti balala nem tenla agütsür, aji shitak amato saka ochi masü. Tanü asenok kija, kibong aser lokti kangshiba temenenji ibaji lir. Ochi yutsür shitak mesükba mapatem inyakba agi asenok kanga timtemdagi. Laishiba nung ashiba ama, asenoki shitak mesükba mapa aika inyaktsü akok saka ochishia meinyak tashi shitak amato inyakba mapatem jagi asenok takoksaleni dang anitsü. Atangji, ochishia alitsü kanga tasak, ibayongji asenok aikati ochishia linüaka melitetter.Ochi mapa inyakra yakta takar makümtsü, mapaa mangutsüa akok aser aika jashidaktsütsü. Ajisüaka, ochiba nung nokdakertemang tatem tashi azükarutsü. Parnok rongsen aser senmangjibo kodanga mesamatsü. Tanü asenoki asenok jakdang atalokbatem jungjunga reprangdangra, ochibo masü saka shitak amai bilema inyakba mapatem ajak amajok akümba angutsü. Atangji, tanü asen lima lokti aser yimten nung ochi laoa lir. Ajak shitak amato saka ochi tilakata mali ta asüba agi gari lenmang meyanglutetter, electric light peria mangur, school aser mozü ki tajung mali nübortem timtemdaktsür. Asenoki ochishia inyak asübo asen lima ya kotak lima amai yanglutetter lila.Yimten tebilemtsüa alemli koker lila aser lanurtem zünger mapa manguba tebilemtsü ya melila. Ochibo mali saka shitak amato bilema inyakba agi state government office nung inyaktsüsa mapabo maka saka inyakertembo aika shimoka lir. Iba jagi amajok nung state sen endoker aser lia liabo ita sen magütsütetter. Aji oda, shitak dang masü saka ochishia meinyak tashi Nagaland majungtsü. Nübortem nem mapa meinyakdaktsüi tiyazü bill yanglur LADF fund amala nungi angati sen agütsübaji shitak amato saka ochi mali, anungji ibaji nübortem ashioktsüba mapa ka dang akümer. Iba amaji government kübok terenlok mapa sen aika jenjang inyaktsü adokdang, iba nung jagi commission agizüka agibaji shitak amato saka ochi mali, iba jagi mapa kecha junga meinyaktetter aser mapa aika inyaktur ayur. Arogo nungertemi yimsüsür aser tulurtem dang tenla meshir, anungji tiyazü bill ka yanglur yangji adjust asütsü atema tenlaji agütsür, shitak amato saka ochimashi mapa arogo nung tenzüker. Joko, asenoka ochimashiba mapa agi shitak küma meinyaki ochishia mapa ajak shitak inyaktsü mapang tongogo.