Ochiba lartem

Alima nung asenok meimchirtem ya asenoksasa asenok sünütsüsüa alitsü makoker, kechiyong asenok madak ain tashi aketba kibur ana lir. Kibur kaji, asen yanglusang Yihovah Tsüngrem aser tangabaji kibur masü ser nung asenok madak kibur küma alitsü merangba Satan, asenok külaoktsüsang lir. Anungji, asenok alima nung ali tashi kibur ana rongnung ya ka mesüra ka tenzüktsü. Iba jagiang, Yisuia asenok dang Mathi 6:24 nung, nisung shingaia kibur ana metenzüktettsü ta ashiba angur. Aji oda, kibur ana rongnungji shiba tenzükner, tetezü shiba lar mesüra shiba kilir süner, aji asenok mulung, asenoki shimtsü. Iba kasa tangatetba nung, Yihusua-ia Israel nungertem dang, nenoki Yihovah Tsüngrem tenzüktsü asü mesüra tanga tsüngrem tenzüktsü, aji nenok mulung, nenoki shimtetang saka “ni aser ozü kibongbo Yihovah Tsüngrem Kibubasa tenzüktsü,” ta ashiba asenoki Yihusua 24:15 nung shia aliba angur. Kodang asenoki Yisu Khrista asenok menen asoshi asü ta memeteti liasü, asenok Satan, temenen, lar liasü, anungji asenok mulungjang nung tajung inyaktsü bilemaka meinyaktet. Iba mapang asenoki asenoksasa asen shi azü aser tebang temeli azüoka linür saka mazüoktetter ta asen taküm agi asensasa asen nümamedangteti lia aru, kechiaser asen taküm nung asen mulung masü saka Satan kibursang mulung liasü. Ibaji angatettsü atema, asenok dang tenyar Paul-i Rom 7 nung ni’ kechi meinyakner aser aser ni’ kechi sempar, itemji dang ni’ inyaker alir, kechiyong aji kü dak aliba temenen satani inyaker ta shia angur. Asenokia asen taküm nung tajung inyakner saka ma ta tamajung inyaker alir ta asüba ya süngmanga bilema alitsü . Alima nung, shitakba shidi süra, shibaibo tamajung inyakner, saka tajung dangbo tamajung tuluba inyaker alir aser tajung inyakertem dangbo tamajung inyaker kanga agia teimba angur. Ibaji asensasa inyaker masü saka asen taküm nung kiburi inyaker. Aji oda, asen taküm nung temenen Satan kibur südaktsü tashi pai mulungba ama tamajung aser temenen mapa dang inyaktsü. Ajisüaka, Yisu Khristai asenok temenen nung alar süa aliba tesamatsüba tia nungi kümzüktsü asoshi Pa taküm bendanga agütsüba ajanga, Tsüngremi asenok temenen Satan kübok alar süa aliba tia nungi salatsü aser nüchi kümtsü, anungji asenok tangbo temenen lar masü saka Khrista nung taküm tasen kümogo ta Rom tapu 6 nung shia angur. Ajisüaka, Satan kübok alar liasüba tia nungi nüchi akümji, joko, tangbo asen inyaknütsü inyaktsü ta masü saka asenok alarbo alarsa mesüra kilirbo kilirsa asütsü. Tetezü, Satan kübok alar süa liasüba nungi Tsüngremi taochi agi asenok salatsübaji kibur melenba mapa ka dang lir, anungji joko tangbo asen taküm nung Kibur aser Kümtetdakbaji Yisu Khrista asütsü. Iba jagiang, temenen satan talenba nungi salaba ajanga asenok ochiba lar akümer ta Rom 6:18 nung shia angur. Anungji, joko asenok taküm nung kechi shitak aser kechi ochi (righteous), item ochi mapatemji dang inyaktsü. Aji oda, temenen talenba nungi salarji, joko asen inyaknütsü inyaktsü ta masü saka asenji asensasa Ochiba lar kümer ochimashi mapa meinyaktsü. Joko, tangbo asenoki tangar ajaki majung aser ochimashi mapa inyakba ngur inyaknüa bilemyonga meinyaktsü, tangar shi azü jangrabalen jangratema senzüya ngur asena senzünüa bilemyonga mesenzütsü, tangar pei chinütsü aser pei jemnütsü chiajema jangratema aliba ngur, asena parnok amaji linüyonga malitsü, tangari asenok mezüngmeshiba marem asenokia mezüngmeshia inyaknüyonga meinyaktsü, kechiyong, joko, asen taküm madak asen kibur masü, anungji asenok mulung masü saka Kibur Yisu Khrsita mulung lir. Asenok Tsüngremi Pa taochi agi asen temenen aser maksü mapatem nungi nüchi küma anitetba sülen, asenok taküm aser jakla yimya indangindanga ochishia alitsüba ya asen mulungba masü saka Tsüngremi mulungba, anungji asenoki Pai mulungba inyaktsübaji asenok mapa lir. Atangji, asenok temenen nung alidangbo asenoki tajung inyaknüa bilemyonga meinyaktet, azüoka linüyonga melitet, saka tangbo asenok tajung inyaktsü bilemba ama tajung tuluka inyaktettsü aser aseni asen taküm meraketa litettsüsa azüoktettsü, kechiyong tangbo asen taküm nung kibur melenogo aser kibur tasenbaji Yisu Khrista lir. Atangji, Ochiba kiburi mulungba ama alitsüba takümji temelaba masü, ibaji alima nung anogo shia raraba tongpang asütsü, item tongpang akoker ajak nem Kiburi sempet yuja lir ta tenyar Paul-isa Timoti dang ashiba asenoki 2 Timoti 4 nung angur. Sempet lira yangji tongpang rara aser tetoktepba ka lir, sempetji angati masü, ibajibo peisasa aazüktsü. Iba tongpangji, anogo shia, ochimashiba lima nung ochishia alitsü merangba tongpang rara asütsü, anungji ochimashiba lima nung ochishia litetba purtemi iba sempetji ajangzüktsü.