Ochimashi anema ano projects kar bilemdar : PM

Panaji (Goa), November 13 (Agencies): Sen 500 aser 1000 anentsüba sülen Deobar nü Ato kilonser, Narendra Modi-i linük nung ochimashi anentsütsü atema ano project kar temulung nung lir, ta metetdaktsü.
Modi-i, “Temerenshi ajurutsü renema lir, kechiyong küm 70 tashi auyartemi ni anema nokdaker,” ta ashi.
Goa nung Mopa greenfield airport atema lung azüngtsüba aser electronic city project mapa tenzüktsüba sülen Ato kilonseri, “iba ya tatembang masü. India nung ochimashi malitsü atema ni ano project aika bilemdar. Kü den amalitepa lidaktsüner aser anogo 50 ni yaridaktsüner, aser ni nenok nem nenoki aginüba India agütsütsü,” ta ashi.
“Onoki tenüng/kibur maliba kiojen anema inyaktsü; Iba ya ochimashi aser black money anentsütsü atema tongti mera ka lir. India nung sen auyar süra aser India tzüküm adena bener oor süra, ibaji bushitsüji onok teinyaktsü mapa lir,” ta pai ashi.
“Kari ni anema nokdaker ta ni meteta lir, parnoki kü jenjang raksatsütsüa akok, kechiyong parnoki küm 70 tashi auyaba lendong nung lir, ajisüaka ni renema dang lir,” ta paisa ashi.
2014 küm nüburtemi ochimashi anema vote agütsü ta shia pai, “iba linük nüburtemi inyakdaktsünüba amai ni inyaker, aser ibaji mezüng Cabinet senden nung ni SIT (black money bushisüngdangba) tentetba asütsü. Onoki kodanga nüburtem dang nungi miimbanga meinyaker,” ta ashi.
Tamalen sokartem aija Ato kilonseri, “parnoki iba ya sendoka toktsü, (anungji) onoki ochishir sensotemi ochimashi tamakok ngudaktsütsü atema tongtibang mera ya agi,” ta ashi.