Ochimashi anema inyakdang opposition-i longkak ayonger: Modi

Kushinagar, November 27 (Agencies): Centre-i sen tamshidak anentsüba anema Opposition party temi Hombarnü ‘Bharat Bandh’ ayongba aija tanü Ato kilonser, Narendra Modi-i, linük nung ochimashi aser black money tera nungi atsüdoktsü merangba mapang ka nung longkak aittsü ayongzükogo, ta ashi.
Tanü Uttar Pradesh, Kushinagar nung BJP sentong ka nung Ato kilonser Modi-i, “Ni black money aser ochimashi anentsütsü aser kari Bharat Bandh ayonger,” ta ashi.
Opposition party tenüng metetshii Modi-i, “Onoki ochimashi nokdangtsü meranger aser parnoki ‘Bharat Bandh’ ayonger. ‘Bharat Bandh’ akatsüla asü ochimashi lenmang nokdangtsüla?” ta asüngdang.
Centre sorkari sen 500 aser 1,000 notes tamshidak anentsüba anema asüng opposition party aikati ‘Bharat Bandh’ ayongzüka lir.
Ato kilonserisa, sen tamshidak anentsütsü telemtetba agibaji tasak liasü saka ibaji ajanga tarutsü anogotem ajungtsü, ta ashi.
Yimtaklirtem densema sensakertemi sen agizüktsü kanga asakba dak sentakba nung Modi-i parnok dang e-wallet amshitsü ajungshi.
“Sen asepba yangkhü abenba putu süiogo, nenoki mobile phone nung noksa tangoker medemer dangi yokba den kasa phone ji bank kongsang ama melamela amshitettsü,” ta Modi-i ashi.
Modi-isa, mobile phone amshi angazüktsü atema nisungtemi class nung maden, iba den kasa nenoki sen transaction atema kasa phone ji amshitsü akok, ta ashi.
“Nenok school-i aoba ajanga mobile charge asütsü angazük asü? Nenoki WhatsApp amshitsü angazükogo. Technology ya melamela kümogo. Na bank account lira, nai kechisa aliner’ar alittetsü akok,” ta paisa shisem.
“Timtem ajangshitsü, ta ni shiogo. Ni nenok dang nungi anogo 50 meshiogo. Item anogo rongnung ano anogo 30 anünga lir aser nüburtem timtemba süngjemdaktsütsü atema sorkar meranga inyakdar,” ta paisa ashi.
“Centre nung NDA sorkari sensakertem, aluyimertem, yimtaklirtem aser dalits atema inyaker,” ta paisa shisem.