Ochimashi anema jajaba

Tan October 30 aser 31 nü ACAUT teloki anir Nagaland nung ochimashi sobaliba anendaktsünertem rongnung temulungertem adenshia Dimapur nungi Kohima tashi tetsüng agi jajaba sentong ka ayongzüka lir. Iba sentong ya asen lima nung ochimashi mapa anema sayutsüngia jajaba mapa ka asütsü. ACAUT telok ya Nagaland nung ochimashi mapa anema nokdakertem lir, anungji parnok mapaji inyaker meinyakma kechiyong Nagaland nung ochishia inyakba tesem tilakata mangur. Aji oda, ACAUT telok nung adenertem asoshia timtem kaji department ka nung mesüra ka nungbo, mesüra maparen ka nung mesüra ka nungbosa pei kinunger adianu kabo mesüra anabo ochimashi inyakertem rongnung dena alitsü. Tatishitsü agi, ACAUT teloki sorkar mapa nung tatidang shitak magi tezülen nungi tejak repranga mesüra sen agi alia mapa anguba purtem anema nokdaktsü apusotsü saka lenmang tom nung item mapai aiertem rongnung kabo pei kinunger adianu asüa ta meteta arutsüa akok. Idangji, tejak meyiptsü asü ? Iba amaji mesüka ochimashi mapa inyakba anema nokdangdang ochimashi mapa inyakertemji bendanger masü asen kinunger aser asen nisung dang asütsüa akok. Idakji tsükdaker anenadoktsü asü ? Ochimashi mapa inyakertemji takar asütsü, anungji parnok mapa anema apusodang, parnok rongnung kari sen agi mesüzüktsü merangtsü aser karibo taküm dena samatsütsüsa amokmerena tsübudaktsütsüa akok, idangji anenadoktsü asü ? Item tasüngdangba ajungaji, ashiko, joko asangsang nung ACAUT nung inyakertemi ajurua alitsüa akok. Itemji tanü tensa Nagaland nung ACAUT purtem kija atema dang masü saka asenok ajak asoshi tatidang tuluka asütsü. Item ajakji kokteta tang tashi ACAUT teloki tasü itta ochi tongpang nung nokdaktetba asoshi pelaa bilemer. Taoba hopta nungang, Dimapur nung Dimapur Ao Lanur Telongjem lokti senden nung jembitsü shimtetba onükji”Ochi Tongpang” liasü. Aji oda, lanurtemi tanü asen lima nung raratsüba tongpang tulutibaji reprangtetogo ta angatetter. Iba jagi temulung terabo anisüngzüker, kechiyong asenoki asenok makdoktsü tsükchir aruba meteta arrsangoktsüogo. Joko, iba tongpang nung nokdaktsü aputsüba dang lir. Ibaji memenutsüla kechiyong asenok kobapiga menudir papigaji asenok tsükchir ochimashi jagi asen lima agiyonga arutsü. Atangji, ochimashi tongpang anema nokdaktsübaji kanga tasak, kechiyong ochishirtemiang iba tongpang nung nokdaktettsü. Tebilemtsüji ochishia lira yakta takar makümtsü, ochishia lira yakta mapa mangutsü, ochishia lira taginüba mangutsü. Nisung asoshi ibaji timtem kanga tulu lir. Iba jagi aikati ochi tongpang nung tatem tonga menokdaktetter. Ajisüaka, iba dang nungi tebilemtsü tuluba kaji tanü amaisa kecha tesoitba aser tenokdangba mali ochimashi sobaliba nem asen yimsü südaktsüra, asüng asen lima nung sorkar mali amai asütsü. Sorkar mali ama asütsü tetezü police mali amai asütsü, obendangdak mali amai asütsü, jail mali amai asütsü, ozüng kecha mali amai akümtsü, anungji pei sünütsü asütsü, anungji shibai tetsübutsü mapa tulutiba inyaktetter aser shibai nisung tamajungtiba kümtetdir, item purtemjiang asen lima nung litettsü. Tanübo asenok ajak longjemer iba ama tetsübutsü tarutsü lima ka yangludagi. Asenok atema shisabolutsü aser tetsübutsü tulutibaji aji lir. Ochi Tongpang tetezüji iba ama tamajungba anogotem marudaktsütsü asoshi nokdangba mapa nung shilem agiba lir. Aji oda, Ochi tongpang nung nisung ajakibo shilem tuluka magitettsüa akok saka ajaki pei akok shilem tilalabo agitettsü. Item shilem rongnung tang ACAUT teloki tetsüng agi Dimapur nungi Kohima tashi jajatsü ayongzükba sentong ya asütsü. Iba sentong nung jembiba ama tangar dang nungibo asenok Ao lanurtem teimba ser shilem agitsü ajungshir. Asenoki kodang ochimashi inyakba mapa anema nokdakba tongpang nung shilem tilaka dang agidir, iba jagi asenoka asenoksasa ochishia alitsü nangzükadoker. Iba jagi Ochi tongpangji aseni tama asen taküm nung kokadoker. Iba ama takok nungjiang tarutsü lima tajungba küma yanglutsüba long amendaktsü.