Ochimashi apuba

Government nung yimten yimsüsür aser ketdangsertemi nübortem anema ochimashi mapa tuluka inyaker saka tebushir mali odang toktsür. Iba jagi ochishia inyaknertem tezüdangdaktsür aser ochishia inyakbajiang meshitak inyaker ama kümdaktsür. Atangji, government nung ochimashi mapatem nokdangtsü, mittsü aser bushitsü asoshi ozünga lateta lir aser nisunga shima lir saka ajaki ochimashi inyaker asünungji nokdanger menokdangbo aser bushir mebushima timtem aika ajuruya alitsü. Ajisuaka, ochimashi agi asenok alena yur tejakleni moudaktsüi soitba ya rakdanger nüchi küma tejakleni aotsüsa ochimashi mapa ya karibosa nüngsen aser tetsübu tizükteta langka nungibosa tenzüktsüla. Atangji, asen lima dang masü saka asen kidanger statetem nunga ochimashi mapatem kanga lir saka tangar state nungbo ochimashi mapatem anema inyaktsü merangba mapatem mapang mapang shia atalokba angur. Tanga Manipur nungbo mapa nungi anener aliba IAS officer ka tenung agi, Abujam Tombikanta Manipur policetemi tan Hombar aonung to apuba osang asenok karibo angashir alitsü. Pa ya 2017 küm Myanmar arrtsülen Tengnoupal ta ajaba district nung Deputy Commissioner inyaka liasü. Iba mapang Imphal nungi Moreh tashi four lane yanglutsü asoshi ali alilokba maparen nung ali kiburtem nem agütsütsü asoshi center government nungi sen crore pezü yokba ochishia malem ta tai tonglokja pua lir. Atangji, pai ochishia inyak asü meinyakar, ajibo obendangertemi ashitsü saka iba kisüng jagi tanüngba ketdangsertem dang ochishia inyaktsüba osang ka metetdaktsür. Mapa nungi dena anener aliba IAS officer ka pa mapang nung inyakba mapa atema apubaji odangbo masü. Ibaji Manipur nung ochimashi bushitsü purtemi junga inyakba kija agi masü mesüra policetemi meranga arishiba kisüng agia masü saka nübortemi ochimashi mapa anema kanga sashia nokdakba ajanga government a mejenbu ajak longjemer ochimashi mapa arishia aputsüsa akümba mapa ka lir. Alima ajungtsü atema nübortemi yamaji ochimashi mapa arishia mapu aser menokdang tashi ochimashirtem temulung ulutsü aser ochishia inyaknertem temulung ilaa akümtsü. Idangji nübortemsa akoksatsü. Alima ya nübortemi yanglur aser yamaji  nübortemi raksar; asenoka teraksartem asütsü asü? Teyanglurtem asütsü?