Ochimashi Company tem sangdongtsü: MP Kirit

Mumbai, November 14 (Agencies): BJP MP, Kirit Somaiya-i, yimti nung aliba nisung kar indang ochimashi sen rizünga ayuba taila company tenüngtem pai sangdongtsü, ta metetdaktsü.
Shiv Sena Tir, Uddhav Thackeray-i Ato kilonser, Narendra Modi dang Swiss bank tem nungi black money meyipa bener arutsü atema “surgical strikes” mera agiang ta jembiba dak sentakba nung Kirit-i, “Taruba hopta ni iba tarensen (company tem) sangdongdang Black money atema surgical strikes ji koma aoer’ar ni Shiv Sena Tir dang sayutsü,” ta ashi.
Centre-i sen tamshidak anentsüba ajanga nüburtem timtemdaktsür ta shia Thackeray-i, “Nüburtemi nü (Modi) dak tamang kanga kaogo. Parnok tamang tashioktsü mesüra parnoki na anema surgical strikes aotsü,” ta jembia liasü.
Osangbenertem den jembidang Kirit Somaiya-i, “Mayawati, Mulayam aser Uddhav Thackeray nungeri, parnoki sensakertem atema shisabulutsür asü sen jenti rizünga alirtem atema shisabulutsür’ar ashitsüla,” ta ashi.
“Ni iba tarensen sayadang ‘Mumbai mafia’, Congress aser NCP-i black money ji kong ali’ar metettsü,” ta ashi.
“Taruba hopta ni item company tenüngtem sangdongdang Mumbai mafia senji kong rizünger’ar Uddhav Thackeray-i meteta akumtsü,” ta paisa ashi.